Home Local Bende conservacion ambiental cu turistanan proponi

Bende conservacion ambiental cu turistanan proponi

225

Durante evento cu orado di Wereld Natuur Fonds

Ultimo fin di siman pasa durante e evento na aula di Universidad di Aruba organisa pa ministerio di medio ambiente titula ‘Marine Protected Areas in Blue Economies’ orado Arjan de Groene, consehero riba e programa di costanan y ocean pa Wereld Natuur Fonds (WNF/WWF) na Hulanda a trece dilanti varios punto cual por yuda Aruba cuminsa proteha e bida den su costanan di manera mas eficiente.

Gobernador Alfonso Boekhoudt tambe a hiba palabra durante e evento, splicando durante su discurso kico asina un economia blauw ta encera. Esaki ta por ehempel percura pa anticipa y incorpora e impacto di cambio di clima riba ecosistemanan marino. Pero tambe evita desaroyo economico cu lo nifica degradacion di medio ambiente y tambe di e ecosistemanan riba nos isla. “E blue economy ta un concepto di crecemento economico, inclusion social y preservacion y mehoracion di bida pa hende pero tambe medio ambiente.”

Integra turismo cu conservacion ambiental
Un di e maneranan cu a propone pa integra e concepto di desaroyo economico hunto cu conservacion di naturalesa ta por medio di integra turismo conhuntamente cu conservacion ambiental. Asina sr. de Groene a propone na un audiencia presente na e universidad, enfatisando cu WNF su meta ta pa stop e degradacion di e planeta su recursonan y pa construi un futuro unda hende ta biba den harmonia cu naturalesa.

Mirando cu usualmente ta midi balor cu placa, sr. de Groene a menciona cu e balor total di naturalesa na Aruba, pues entre otro e servicionan cu naturalesa ta brinda nos, ta 300 miyon dollar pa aña riba nos isla. Ademas el a cita cu den un encuesta, cual aunke no representativo, 50% di turistanan cu ta bin nos isla a expresa cu si ambiente marino sigui degrada, nan lo dicidi di no sigui bishita Aruba.

Interdependencia

Sr. de Groene a argumenta cu nos mester reconoce mas cua ta e servicionan cu naturalesa ta brinda nos y di cua manera esaki ta trece desaroyo economico. El a menciona restaurant Zeerovers na Savaneta cual ‘segun mi a compronde ta bende pisca fresco di costanan di Aruba. Bo kier percura pa atraccionnan asina keda existi y pa esey bo tin di percura cu piscanan ta sano rond di Aruba su costanan’.

Bende conservacion di naturalesa cu turista’
Tin diferente maneranan cu por proteha areanan marino di Aruba, segun sr. de Groene. E prome di cual ta integra turismo cu conservacion marino: por medio di bende restauracion di naturalesa na turistanan. “Hende kier sinti manera nan ta contribuyendo na algo importante.”

Un otro consideracion ta cuminsa plania tur loke mag y no mag di pasa den ocean. “Bo lo bringa cu otro pa basta tempo pero den otro paisnan nan a demostra cu marine spatial planning ta trece resultadonan den termino largo.”

Siña di Boneiro
Alabes por tuma ehempel di nos propio isla ruman Boneiro cual pa hopi tempo tin nan areanan marino proteha. Y e manera cu esaki ta traha ta cu mescos na Aruba tin fundacion Parke Arikok, un fundacion ta maneha e areanan aki. E fundacion aki ta financia di manera sostenibel, por medio di tin su propio entrada cual ta yuda e fundacion sigui existi y saca cara pa existencia di e area marino proteha.

Turismo ta trece mas cu 3 biyon di entrada indirecto y directo na Aruba. Tin di cuminsa uza esaki tambe pa proteha lama.” Un otro alternativa cu sr. de Groene a trece dilanti ta pa intercambia pagamento di debe pa financia iniciativanan ambiental. “Parce cu Aruba tin bastante debe pues esaki por ta un opcion realistico. Paisnan manera Mexico a yega di haci esaki.”

Iniciativa di comunidad

Por ultimo sr. de Groene a recomenda pa desaroya mas iniciativanan cu ta bin di parti di comunidad mes. Un ehempel di esaki ta cu tin poco data riba e salud di coralnan y ecosistemanan marino rond di Aruba, pues ta imperativo pa un iniciativa bin di parti di comunidad pa colecta data riba e salud di nos lamanan. E recomendacion aki ta concorda cu studiante Annemieke Drost di colaboracion di research entre studiantenan di University College Utrecht y Universidad di Aruba, cual a ehecuta un proyecto di citizen science pa su tesis.

”Crea legislacion cu lo haci posibel cambia e sistema economico lo tuma tempo. Pero si Aruba no tuma accion tin chens cu e lo bay perde su coralnan, su rifnan of su beachnan.”

Nos a papia despues di e evento aki cu un señora Geerman kende a haya cu aunke a trece bon informacion dilanti, e lo kier a wak miho interaccion y intercambio di ideanan entre publico y e orado. “Si bo bin cu un style di town hall meeting mi ta kere lo surgi hopi mas discusion cu simplemente duna un presentacion.”