PPA a sigui e conflicto entre Gobierno di Reino y Gobierno di Aruba, pero tambe e conflicto serio di desconfianza entre fraccionnan den Staten encabesa pa Ady Thijsen y Roco Tjon pa hopi tempo di cerca!

Historia cu a conduci na e diferencia serio aki!!
E diferencia di opinion profundo y serio aki tin di haber cu e hecho cu primeramente a consecuencia di e maneho fatal di gobierno Mike Eman esaki a entrega nos autonomia financiero cu Aruba tabatin desde 1954 y a wordo expande na 1986.

E entrega di e autonomia financiero tabata asina serio cu partidonan di oposicion encabesa pa MEP a organisa un protesta cu a conduci cu parlamento a wordo destrui y propiedad di hende a wordo cendi na candela pafo di Parlamento.

Sinembargo e mayoria di AVP a bay di acuerdo pa pasa un Ley Nacional di Aruba

(Laft) den cual e autonomia financiero di Aruba a wordo grandemente entrega na gobierno Hulandes. Gobierno Hulandes/Gobierno di Reino a encarga e instancia di CAFT situa na Corsou pa ehecuta un control stricto riba gobierno di Aruba y duna conseho periodicamente. Si Aruba su gobierno no tene cuenta cu e consehonan aki, CAFT lo por pidi Gobierno di Reino pa atende e problematica y Aruba lo por ricibi un ‘Aanwijzing’ pa medio di un KB (Koninklijk Besluit), algo cu desde 1954 cu nos Autonomia Insular NO tabata posibel. E entrego di autonomia aki tabata pa tres aña y lo mester a caduca na december 2018!

Kico a pasa realmente?
Gabinete Wever-Croes su signatura di MEP a tuma over gobernacion na november 2017, y – contrario na nan promesa sagrado den tur reunion durante mas cu un aña, guiando pa eleccion, a splica cu nan MEP a studia e problematica financiero hopi bon y ta garantisa e pueblo cu lo no tin mester di medida – a inicia pa hiba un maneho cu tabata grandemente basa riba medida, causando un presion riba e cartera di ‘Bouchi Juan y Shi Maria’ den tur sentido di palabra.

*Mirando cu december 2018 tabata na bisto Parlamento di Aruba (Thijsen/Tjon c.s.) a indica na gobierno di Aruba cu lo mester bin cambio formal den e Ley di Laft pa asina e cuadra mas cu nos Statuut y Staatsregeling.

* Gabinete Wever-Croes sinembargo a yega na un protocol na november 2018 cu Gobierno Hulandes cu e Ley existente di LAFT lo keda na vigor pa 3 aña mas. Cu otro palabra, Gabinete Wever-Croes tambe a entrega ‘autonomia financiero’ di Aruba pa tres aña, mescos cu AVP a haci.

*Na final di Ddecember 2018 e Ley di LAFT a termina y te awe no tin Ley di LAFT na vigor mas na Aruba; sinembargo tur, tanto gobierno di Aruba como parlamento, a sinta keto y laga CAFT sigui funciona, poniendo demanda pa mas medida riba gobierno di Aruba.

*Ta te algun luna despues na mei 2019 gobierno Wever-Croes a entrega un concepto di LAFT cu tabata cuadra grandemente cu e ley bieu di LAFT cu algun excepcion chikito e.o. pa legalisa nombramento di sr. Henk Kamp, un ex politico Hulandes cu a wordo nombra contra Ley den CAFT.
*Durante e proceso legal pa atende cu e concepto di LAFT, varios bes por a mira con Parlamento ta pidi cambio, pero gobierno di Aruba ta rechasa e cambionan aki!

* Esaki a conduci cu Parlamento di Aruba (srs Thijsen/Tjon ) a presenta un amienda cu a bay contra e posicion cu Gabinete Wever-Croes a tuma y a kita podernan for di Gobierno di Reino, di tal forma cu e ley di LAFT a keda sin e posibilidad pa Gobierno di Reino ehecuta control conforme e Protocol/acuerdo entre gobierno di Aruba y Gobierno di Reino. Constitucionalmente y politicamente, e amienda tabata un mocion di desconfianza contra ‘maneho y posicion’ tuma door di gabinete Wever-Croes y cualkier gobierno cu tabata respeta su mes y tabata aplica e principionan di ‘bon integridad’ lo a entrega nan retiro fecha 6 di juni 2019. Sinembargo, gabinete Wever-Croes sabiendo cu e masa di pueblo no ta comprende e materia, a dicidi di haci manera nan nanishi ta sangra y a nenga di baha.

Gobernando lomba contra Muraya!
No cabe duda cu e amienda di grupo Thijsen/Tjon a hinca gobierno di Aruba den mas problema cu Gobierno Hulandes/Gobierno di Reino, cu a demanda cu gobierno di Aruba cumpli cu e acuerdo cu nan tin cu Aruba cual acuerdo ta stipula den dos Protocol y e Ley bieu di LAFT.

Gobierno desde 6 di juni ultimo a declara na varios ocasion cu nan relacion cu Hulanda lo ta basa riba e Protocol cu nan a firma na november 2018, rechasando na varios ocasion e amienda di nan propio miembronan di Staten, e grupo Thijsen/Tjon.

Dia 30 di augustus, gobierno di Reino a duna gobierno di Aruba te dia 20 di september 2019 pa A. ehecuta e conseho di CAFT; y B. determina su posicion oficial pa cu e concepto di Ley cu e amienda Thijsen/Tjon c.s. cual amienda su meta tabata pa limita e rol di ‘Hoger Toezicht’ conforme palabranan entre gobierno di Reino y gobierno di Aruba.

Den e intercambio aki ta notabel cu Gabinete Wever-Croes tabata rogando Gobierno di Aruba pa ‘meer tijd en ruimte’/ mas tempo y espacio.

Ta aki unda nan a jega na otro pa un periodo cortico.

Gobierno di Aruba oficialmente a manda un carta pa gobierno di Reino den cual oficialmente nan e priminti di no manda e concepto di Ley (cu e amienda) pa Gobernador di Aruba firma. Politicamente esaki ta nifica cu gobierno di Aruba a benta nan miembronan di Staten bou di bus! A laga nan propio miembronan di Staten MEPORED cay completamente!

Pa regla esaki ta nifica cu si grupo Thijsen/Tjon tabata miembronan di Staten cu tabata respeta nan mes y nan dignidad cu nan lo a kita sosten for di Gabinete Wever- Croes un bes mas, cual a nifica cu Gobierno lo a bay cas diabierna pasa, sinembargo e hamber pa keda na poder ta pone cu declaracionnan ta wordo duna cu no ta cuadra cu e realidad/crisis politico cu nan a hinca nan mes aden.

Otro alternativa cu tur 12, sigur Thijsen/Tjon, tin ta pa nan mes entrega nan retiro y laga otro miembro di Staten wordo eligi segun Ley pa drenta Staten.

Mientras tanto, pa tapa e realidad tristo aki, Gabinete Wever-Croes ta haci comosifuera cu nan tin cos di celebra pasobra e KB lo no ta riba mesa mas!

Ki tristo cu partidonan cu a ricibi confiansa di pueblo por malinforma nos pueblo di tal indole di kico realmente ta pasando.

Mientras tanto, Staatssecretaris Knops lo a declara cu a duna Gobierno di Aruba te dia 18 october proximo pa cumpli.

Mientras tanto ex miembro di Parlamento, sra. Sue Ann Ras a tuma su retiro pa algo chikito compara cu e ‘trato’ tristo di e fraccionan den Staten versus nan propio Gobierno y vice versa. E trato di ambos parlamento versus Gobierno di Aruba y Gobierno di Aruba versus Parlamento ta un ‘Wild West’ completo nunca bisto den politica Arubano.

Crisis Constitucional y crisis Politico?
E pregunta cu si lo tin un crisis constitucional ta un pregunta evidente!

Y e solo hecho cu e ‘issuenan’ cu a crea e crisis aki ta riba ‘agenda’ di Conseho di Reino y ta keda prolonga pa lunanan caba ta e prueba palpable di e crisis constitucional entre gobierno di Aruba versus parlamento di Aruba pero na mes momento versus gobierno di Reino! Tin un crisis constitucional hopi hopi serio.

Esun cu no kier wak e tin motibo politico pa no wak e realidad amargo cu ta riba tayo di tanto Den Haag como Oranjestad, pero tambe riba tayo di nos pueblo. Esunnan cu ta rechasa dia wak e realidad ta sea indoctrina of nan laso politico no ta permiti pa nan acepta e realidad amargo riba mesa.

Mientras tanto PPA ta di opinion cu Aruba ta confrontando un racha di problema cu no ta mirando un maneho pa soluciona nan:

  1. Nos Mega Debe.
  2. Con pa cumpli cu demanda di CAFT cu ta pidi mas medida?
  3. E hecho cu Aruba NO tin un presupuesto 2020 entrega na Parlamento.
  4. Un falta di un maneho economico dinamico !
  5. Un pobreza grandi den pueblo.
  6. 6,000 Arubiano sin trabou!
  7. Un centro di San Nicolas pero tambe centro di Oranjestad den crisis serio.
  8. Un crisis den Salud Publico cu un Hospital cu hopi problema a consecuencia di yobida (mal trabou, guia y control!)
  9. Ilegal riba nos Isla
  10. Crimen tumando luga diariamente!
  11. Problemanan serio entre Ministro di Enseñansa cu e veld di maestro di Enseñansa y mucho mas.

E lucha pa nos Status Aparte tabata un lucha pa Aruba ta ‘baas den su propio cas’. Un lucha pa e Arubiano ta liber den su pais pa por pensa pa su mes, pa por sa pa su mes e diferencia entre bon y malo, berdad y mentira y pa por husga pa su mes ora un direccion ta malo pa futuro di su pueblo. Si nos pueblo di Aruba no ta consciente cu e crisis constitucional/politico y e crisis financiero/economico ta cobando un buraco mas y mas hundo pa nos mes y pa futuro generacionnan anto Aruba ta leu di cas y tur esaki pasobra den politica varios partido ta practica ‘Indoctrinacion di nan pueblo’ un politica cu ta stroba e pueblo di mira cu algo ta bayendo definitivamente robes.

PPA un organisacion politico serio y dedica na sirbi nos comunidad ta suplica nos pueblo, cada Arubiano, cada ciudadano pa sinta analisa e realidad amargo di awe y demanda mas claridad y solucion pa e problemanan cu ta afectando nos pueblo.

 

LEAVE A REPLY

Please enter your comment!
Please enter your name here