(AP) – Jennifer Bergin tabata obeso caba y pre-diabetico prome cu e pandemia a cuminsa, y e descubrimento cu e tambe tabata sufriendo di presion di sanger halto a pone cu el a preocupa di con malo e lo bira si e contagia cu coronavirus. El a cuminsa cana 3 ora pa dia, eventualmente perdiendo 60 liber.

“Mi djis tabata sa cu mi tabata e candidato perfecto pa hay’e y no recupera,” segun Bergin, un residente di 50 aña di Charlotte, North Carolina a bisa. Awo, cu un peso di 170 liber pa un estatura di 5 pia cu 4 inch, e no ta considera obeso mas, aunke e lo sigui tuma e medidanan necesario pa sigui mehora su salud.

Desde e comienso di e pandemia, oficialnan di salud a adverti cu obesidad y cualkier condicion relaciona cu obesidad manera diabetes ta factornan di riesgo severo pa cu COVID-19. E tabata un otro recordatorio di tur e problemanan di salud cu hopi biaha ta señala pa obesidad, pero tambe di con dificil perdida di peso por ta. Hasta den momentonan di riesgo asina grandi, e no ta claro con comun e perdida di peso dramatico di Bergin lo por ta.

Rond di e pais, tin un sinnumero di persona di tur tipo di curpa y peso, cu a subi of baha di peso durante e pandemia. Pa algun, manera Bergin, e hecho cu ya no tabatin mester di tuma transportacion publico pa bay oficina a nifica mas tempo pa cana, come menos cuminda riba caya y mas control riba loke e tabata come. Pero pa otronan, e hecho di ta cera den cas tabata nifica menos motibo pa move, y come mas pa motibo di stress, ansiedad y depresion, y hopi biaha tambe proximidad hopi cercano di e cushina.

“E diferente cambionan di peso cu por ocuri ta tapa hopi di con compleho obesidad por ta, incluyendo con grandi e rol cu un persona su circunstancianan por hunga den su salud ta”, Karen H. Yeary, un investigado di obesidad na Roswell Park Comprehensive Cancer Center den Buffalo, New York ta bisa. “Cual ta contrario na e creencia cu hende tin di pensa cu perdida di peso ta un cuestion di kier”, Karen ta agrega.

“E ta tuma hopi esfuerzo, y energia pa come saludabel y despues di esaki perde peso” Yeary ta comenta.

Otro motibo dicon combati obesidad ta un tarea dificil ta pa motibo cu aumento di peso hopi biaha ta pasa poco poco cu tempo, haciendo e mas dificil pa hustifica esaki como un problema di salud. Na Merca un cantidad calcula di 1 den 4 adulto ta sufri di obesidad, y 1 den 3 ta sufri di sobrepeso.

Hopi biaha ta solamente despues di un condicion of sintoma di salud severo manera un ataca di curason of deterioro notabel den e estilo di bida cu hende ta realisa cu mester baha di peso y ta cuminsa motiva pa por haci esaki, Eric Plaisance, un investigado di obesidad na University Of Alabama na Birmingham ta bisa.

Aunke e pandemia a ilumina riesgonan di obesidad, e ta bisa cu hendenan ya caba tin e custumber di tende con malo pa salud e ta pa tin sobrepeso, sinembargo no ta haci nada pa evita esaki. “Usualmente e ta rekeri un evento hopi mas impactante, cu por cambia e persona su bida na un nivel personal” e ta comenta tocante kico por motiva un persona pa perde peso efectivamente.

Esaki tabata e caso pa Mickey Beatima, un residente di Seattle di 29 aña ken a cuminsa perde peso un par di luna prome cu e pandemia despues cu su diabetes a cuminsa causa problema di bista. “Na e momento ey mi a realisa cu mi mester haci un cambio” Beatima a bisa, cu tin un estatura di 5 pia y 8 inch y a baha di 300 liber pa 170.

E pandemia a acelera su esfuerso nan haciendo e perdida di peso uno mas facil. E no tabata por a pidi cuminda pa di caya ni bay sali come cu famianan of amistadnan, haciendo cu e mester a cushina na cas y asina tin mas control riba kico e lo come y con saludabel e por haci esaki.

 

LEAVE A REPLY

Please enter your comment!
Please enter your name here