Jaime Salcedo

Ex presidente di Asociacion Amigos de Colombia (ASOCOL) y agente di biahe, sr. Jaime Salcedo a observa cu e benta di ticket pa Aruba a aumenta considerablemente, despues cu a wordo anuncia e eliminacion di visa pa e bishitantenan Colombiano entrante 3 di december awor.

Di otro banda e aumento aki tin di haber tambe cu actualmente Avianca tin un oferta masha barata di ticket ida y buelta entre Colombia y Aruba. Sinembargo tocante eliminacion di e visa, sr. Salcedo ta conseha  masha prudencia cerca e Colombianonan residencia na Aruba, y el a conseha pa nan warda e rekisitonan cu lo wordo pidi na e turistanan Colombiano, prome cu nan ta cumpra nan ticketnan.

Imagen positivo
E ta haya cu eliminacion di e visa Schengen ta mustra cu Colombia a mehora hopi su imagen, y awor e Colombianonan  lo por gosa di e beneficio di bishita Europa y otro paisnan manera Aruba sin mester di visa.  “Mi ta wak esaki hopi positivo y e ta bay yuda hopi den e relacion y intercambio bilateral”, el a bisa.

Sr. Salcedo cu ta director di e agencia di biahe Jasaba a declara cu e eliminacion di e visa lo genera hopi turismo, pero tambe lo aumenta e presencia di Colombiano riba nos isla pa motibo di bishita familiar. E sentimento cu e ta haya fei nan clientenan Colombiano ta cu pa prome biaha, despues di hopi aña, nan lo celebra e fiestanan di december cu nan famia. Ya cu introduccion di e visa a haci mas caro e producto Aruba, y awor eventualmente e costo lo disminui.

Condicionnan
Sin embargo e ta comenta cu mester warda riba e condicionnan cu nos autoridadnan lo bin cun’e pa controla e fluho di Colombiano cu lo bin nos isla. E ta sugeri pa nos autoridad local no kita e facilidad di e Colombiano cu tin visa di Merca caba,  ya cu esaki lo garantisa e entrada di e Colombiano aki, sin mester cumpli cu e rekisitonan stricto cu lo bin cun’e.

Sr. Salcedo tabata presidente di Asociacion Amigos de Colombia ora cu a wordo introduci e visa pa e bishitantenan Colombiano na Aruba. E ta recorda cu e clima cu e rekisito aki a crea tabata uno negativo pa e Colombianonan residencia na Aruba. Awor e clima cu nos por respira ta cu Colombia su imagen a cambia.

“Ya e tempo malo a pasa caba, tempo cu ora un Colombiano tabata comete un fechoria, anto tabata señala tur e Colombianonan”, el a bisa. Tambe e condicion di trabou a cambia na Aruba compara cu mas cu un decada pasa. Antes no tabatin desempleo, awor Aruba ta maneha un tasa di desempleo di algo mas cu 7%. “E condicion di Aruba tambe a cambia. No tin e abundancia di trabou cu tabatin antes”, el a bisa.

E realidad aki, sr. Salcedo a haya cu ta un filter cu lo permiti cu berdaderamente esun cu ta bin fei di Colombia ta e berdadero turista, esun cu ta keda den hotel y gasta; of esun di bishita familiar ta bandona nos isla despues. E ta haya cu mester bin cu un campaña pa conscientisa nos hendenan pa no sostene ilegalidad y pa tur bishitante cumpli e rekisito di 90 dia maximo pa keda na Aruba. Di e forma aki tur cos lo funciona bon, y no mester bin cu implementacion di otro visa.   

LEAVE A REPLY

Please enter your comment!
Please enter your name here