Bishita ‘relampago’ di Rutte na Aruba

ORANJESTAD – Prome cu su salida di Aruba, unda e tabata pa un bishita ‘relampago’ cerca gobierno, mas specificamente su colega sra. Evelyn Wever-Croes, prome minister Hulandes Mark Rutte a duna un rueda di prensa na aeropuerto di Aruba.

E bishita na e islanan ABC tabata centra rond di su bishita na Curaçao, den cuadro di un delegacion comercial Hulandes lidera pa e prome minister, unda a trata di cera e base pa un colaboracion comercial mas fuerte, treciendo e sectornan economico di e isla y di Hulanda mas cerca otro. Tambe ta bishita e islanan secretario di estado Raymond Knops, hunto cu Rutte, mientras ta sperando yegada di minister Ferd Grapperhaus di Husticia, cu lo ta na Aruba pa e consulta di e ministronan di husticia di e cuatro paisnan den Reino (Vierlandenoverleg).

Rutte den su intervencion a bisa cu su biahe ta encera principalmente tres punto, cu ta e situacion financiero, bon gobernacion y un economia diversifica. El a remarca cu gobierno di Aruba a cuminsa cu un plan di gobernacion bastante ambicioso, pero cu ta su impresion cu no a keda na palabra so, sino cu ta mira ya cierto avance.

Pa loke ta finanzas, por bisa cu tin acuerdo y Aruba ta implementando esaki, pues no tin tanto pa anuncia den e sentido aki. Bon gobernacion tambe ta un topico di cual e por a nota tambe cu gobierno ta haciendo lo necesario pa logra mehoracion den esaki. E no a bay mas den detaye. Relaciona cu e di tres punto, el a bisa cu banda di turismo, pa cual Aruba ta asina conoci y cu ta marchando bon, ta necesario pa diversifica economia, pa por crea un base mas amplio. E ta kere cu tin suficiente oportunidad tambe pa por logra esaki mirando cu Aruba ya tin cierto nomber den energia ‘berde’ y mester sigui explora mas den iniciativanan innovativo, mencionando tambe logistica.

Sin embargo, e tabata invita na Curaçao pa e iniciativa pa aya traha riba mas relacion cu empresario Hulandes. Aruba no tabata contempla den e iniciativa aki. Nada straño anto cu durante e preguntanan di prensa a haci e pregunta na Prome Minister Wever – Croes pakico Aruba no tabata envolvi den e iniciativa aki, considerando esaki talvez un oportunidad perdi. El a contesta cu tin biaha Curaçao ta cana dilanti cu cierto cos, aki tambe. Como cu Aruba, segun e prome minister, den e prome aña tabata hopi mas envolvi y preocupa cu e aspecto financiero. Esey a haci cu ta canando atras, no obstante cu e posibilidadnan den otro iniciativanan economico, basa riba energia renovable y innovacion, ta existi y mester probecha nan. Awor cu e asunto financiero ta canando, lo tin mas atencion pa e aspecto di diversificacion y crecemento economico, segun e mandatario. For di e diferente preguntanan di prensa local a discuti mas ampliamente alrededor di algun tema, manera e problematica di e areglo di disputa, e asunto di Venezuela y relaciona cu esaki e asunto di refugiado/ilegalnan, y desaroyo economico.

Refugiado/ilegal
Pa loke ta e tema di refugiado o ilegal, Bon Dia Aruba a haci e pregunta si e diferencia di opinion existente no ta simplemente cu esun (Hulanda) ta pone enfasis riba e problema como un problema di ilegalidad, cu e pais mes mester maneha, mientras e otro (gobierno di Aruba, y Curaçao) ta mira esaki mas como un problema di refugiado cu ta rekeri accion conhunto y apaoyo Hulandes.

Rutte a contesta cu e no ta mira e asunto como un diferencia di opinion, ya cu segun e tin un entendimento riba esaki. Premier Wever Croes a elabora mas riba esaki bisando cu Aruba lo bin dilanti cu un analisis mas extenso riba e tema aki, specificamente pa prepara pa momento cu lo tin un problema di refugiado, y hunto cu esaki tambe un plan financiero pa acompaña esaki. Esey lo ta e momento pa bolbe cerca gobierno Hulandes pa delibera tocante apoyo financiero. Tambe lo tin disponibilidad di ayudo tecnico den e proceso aki di parti Hulandes.

Areglo di disputa (Geschillenregeling)
Prensa a toca e tema tambe di e areglo di disputa, y den esaki ministro Knops di asunto di Reino a interveni.

El a duna mas bien un spliacion tecnico di con e proceso di consulta y decision tabata den seno di conseho di ministro di Reino, y cu actualmente ta haci e preparacion pa e tratamento den parlamento Hulandes. El a evadi realmente e punto cu pa e islanan a keda fastioso, den e sentido cu e proyecto di ley no ta contempla e institucion di un instancia independiente cu ta huzga di forma imperativo den disputa huridico, manera e islanan ta desea, y cu ta loke a palabra den pasado. Tur cos ta mustra anto cu e islanan tin un ultimo oportunidad na juni durante e tratamento den Tweede Kamer, pa purba influencia e texto final di e ley. E opinionnan tocante posible exito den esey ta varia.
Ayudo pa San Nicolas

Bon Dia Aruba a referi na e bishita di premier Rutte como hefe di un delegacion comercial na 2013, unda tambe a bishita San Nicolas y su alrededor. E tempo ey e mes a observa cu esaki ta e region di Aruba cu mas tin mester di un esfuerso dirigi na pone e area na nivel pareu cu e resto di e isla. Despues di por observa cu no a sucede tanto den e sentido ey den e cinco añanan cu a transcuri, e pregunta di Bon Dia tabata kico lo por ta e posibilidadnan pa yuda Aruba haya fondo Hulandes o Europeo, destina na rehabilitacion di partinan di un pais dentro di e Union cu tin mester di esaki.

Premier Rutte ta conta cu a pesar di tanto aña na cabes di su pais, ainda e no ta bon na altura di e sinfin di regla cu Union Europeo tin, loke ta e experiencia di otronan tambe, pero cu en todo caso ta parce un bon idea pa explora e posibilidadnan aki. E lo ta pendiente di tende mas di Aruba di esaki.

Rumbo pa Suiza
Premier Rutte ayera tardi a continua su biahe pa Hulanda y di inmeditao lo sigui pa Suiza, unda e lo asisti na e Foro Economico Mundial, cu ta inicia awe na Davos, Suiza.

You May Also Like

Simposio ta cuminsa cu analisis di corupcion den Reino

Ayera anochi a tuma luga e prome anochi di e simposio organisa conhuntamente pa ...

21Jun,JO, Parlamento.JPG

Parlamento ta exigi transparencia riba documento nan firma na Venezuela

Presidente di Parlamento, Marisol Lopez-Tromp a manda un carta pa gobierno pidiendo tur informacion ...

Gerencia di Arubus ta hiba sindicato STA corte

Gerencia di Arubus ta entama un caso sumario hibando sindicato STA corte diabierna mainta. ...

Proyecto di Watty Vos Boulevard den pleno ehecucion; construccion di 8 rotonde nobo

ORANJESTAD – 2019 lo ta un aña druk pa loke ta construccion y mehoracion ...

A3 24nov desaroyo di malaria.jpg

Malaria a yega cifra record na Venezuela na 2015

ORANJESTAD – Autoridad di GKMB a bisa di ta monitor e situacion di vector ...