Blogsite ta mustra copia di transaccion; Acusacion cu Mike Eman tabata tuma placa di Rincon

Riba e blogsite koninkrijk.home.blog unda ta aparece un serie di articulo tocante e situacion na e islanan Hulandes den Caribe, a sali un articulo fecha 23 di april 2020, den cual ta critica e actual operacion di ex-premier Eman riba escenario politico na Aruba den tempo di coronavirus, y ta bolbe tambe na un di e hazañanan di su gobierno: e deal cu Citgo.

E site ta acusa e ex-premier di a tuma placa pa financia su campaña electoral: “E anterior premier di Aruba a tuma placa sushi di criminalnan y a financia su campaña electoral pa un gran parti cu esaki. Totalmente contra su propio promesa di campaña el a cera un deal sin valor pa Aruba cu e refineria Citgo. Pues banda di cera un deal criminal, Mike Eman a haci su mes culpable na engaño di e pueblo votador,” segun e texto di e blog.

Como prueba di loke e blogsite ta pretende, a mustra imagen tambe di un banktransfer, di e compania Tradequip estableci na Maracibo Venezuela. Ta trata di un suma di US$ 49.950 cu a bay pa e cuenta na Aruba cu e descripcion di “Fundacion Campaña Mike Eman” na cuenta bancario 81712501. E fecha di e transaccion ta 16 september 2013, como un siman prome cu eleccion pa parlamento na Aruba di e aña ey. Investigacion propio di Bon Dia Aruba ta mustra cu Tradequip C.A. ta un compania estableci actualmente na Maracaibo, adres Los Haticos No. 121-86. Persona di contacto: Roberto Rincon.

E compania aki ta liga na Tradequip Services & Marine Inc, cu sede na Houston y propiedad di e mesun Roberto Rincon, cu actualmente ta sintando un castigo di varios aña na Merca pa soborno y labamento di placa, den cual su empresanan tabata hunga un papel.  Na momento di e transaccion ainda Roberto Rincon tabata homber liber. Na december 2015 Rincon y su socio, Abraham Shiera a ser aresta pa autoridadnan federal Mericano y treci dilanti un corte federal na Houston, acusa di maneha mas di mil miyon dollar den placa di soborno pa haya contract di suministro cu e empresa estatal Venezolano Pdvsa.

Redaccion di e blogsite a laga sa, na final di nan articulo, cu nan ta “den poder di mas prueba di cu e ex-premier a tuma sumanan substancial na placa criminal.”

Nota di redaccion:

Por observa cu e placa a bay pa e fundacion di campaña di ex-premier Eman, cu ta recauda placa pa campaña. Esaki ta mustra un biaha mas riba e importancia pa Aruba haya ley cu ta regula financiamento di partido politico. Den un ley asina por stipula cu entidad di exterior no por contribui na campaña electoral, pa mantene un ‘level playing field’ entre e competidornan den eleccion.