Tin un dicho Hulandes cu ta cuadra 100% cu e postura testarudo y omnipotente di Otmar, esta”de aanhouder wint”. No tin nada y ningun hende cu lo por sikiera cuestiona e locura di Otmar y esaki a wordo demostra atrobe cu su decision pa sigui cu su intento pa cueste loke cueste logra e incinerator.

Cu cierto reserva UPP a bin ta sigui e culminacion di e bidding publico di diabierna ultimo pa loke ta e W2E-incinerator. UPP for di aña pasa a cuminsa observa y adverti Pueblo, Parlamento y Gobierno pa e tipo di planta aki, esta di kima sushi pa produci coriente. UPP a comparti su preocupacion cu un incinerator lo no ta na bentaha di Aruba, mirando nos scala chikito e.o. y e costonan envolvi.

Tin cu a kere cu Otmar a perde guera of cu alomenos e fabula di e dje a yega na un fin. UPP sinembargo mas bien tabata spera cu e minister lo a tuma su tempo pa reflexiona y recapacita un rato y institui un “cooling off period” pa por hiba un discusion sano basa riba un miho investigacion cu e fin pa yega na un solucion berdadero y duradero pa e tratamento di desperdicio na Aruba. Asina brinda e oportunidad pa prepara e concepto di un economia circular, un economia blauw cu gobierno mes recientemente a presenta y cu UPP pro y na 2017 tambe a propaga den su programa pa eleccion.

Kico lo por ta e motibo cu ningun compania a haci un bidding? E contesta ta facil. Na prome luga e posicion financiero di Aruba ta pessimo. No mucho tempo atras nos bond a wordo categorisa como casi junk. Cua inversionista of compania kier riesga un inversion asina di rond di mey biyon florin cu tanto incertumbre, falta di transparencia y un minister cu kier pa tur hende kere den su “sprookje”. Otmar ta sigui al pie de la letra e modus operandi di Mike Eman cu pa 8 aña largo a haci y deshaci pa cual motibo awe nos pueblo ta hinca den un debacle financiero grandi.

Un otro motibo lo por ta e hecho cu particularmente tin falta di cifra confiabel, manera cuanto sushi realmente Aruba ta produci, cuanto sushi ta keda atras pa un incinerator ora cu caba di bin cu RRR-concept, cu Eco-gas tambe hiba su maneho di desperdicio, di reciclahe y di exportacion di “sushinan trata” den e caso aki pa Colombia. Igualmente tin hopi duda den e cifranan di e “tipping fee”. Kico ta e espacio cu tin pa esakinan sigui desaroya di tal forma cu alfinal e “tipping fee” lo bira uno impagabel pa e consumidor, esta e pueblo. Y aki ainda nos no ta mishi cu e falta di claridad por ehempel con WEB ta bay cumpra e coriente cu e planta di incineracion aki lo bay procesa y na ki prijs.

E minister no a tuma ni tempo pa reflexiona y puntra di con no tabata tin ningun interesado. A pesar cu el a menciona na prome instante cu lo ta pa motibo di tempo y complexidad di e materia, comosifuera cu e si lo ta domina esaki, e 27 companianan cu a presenta na RFI no a presenta na e bidding. Dicon e minister no a haci esaki na december 2018 ora cu e companianan local a pidi pa “uitstel” y te hasta DOW a conseha pa esaki pa e incenirator chikito? Despues cu e “tender” a fracasa, e minister ta mustra di lo sigui cu su plannan pa bin cu e incinerator aki, pero awor ta bira a base di un destaho riba invitacion of tambe bou man. Nos tin comprendi cu lo bay invita companianan cu a pidi e bestek. Pero esaki di antemano mester duna di conoce cu keto bay nan ta interesa, pero e condicion ta tambe cu nan mester splica “pakico” (e razonnan) dicon nan a dicidi di no participa na e bidding di diabierna ultimo. Obviamente aki e minister ta purba na saca informacion, cu kisas por ta confidencial di of pa e compania, pa asina kisas e por sigui manipula.

Den e cambio di wega aki tambe, ta habri caminda pa Otmar bin cu cambionan den bestek pa e por logra haya e compania/inversionistanan aki pa toch participa y na mes momento companianan tambe por bin cu nan exigencianan na beneficio di nan mes, pa asina den nan bista haci e proyecto aki factibel pa nan. Aki ta unda kisas un di e condicionnan lo por bira cu pais Aruba lo tin di para garantia atrobe? Kisas ta pa esaki e minister a cuminsa propaganda e proyecto di W2E como un BOO cu defacto lo por bira un PPP toch? Si esaki ta e intencion di e minister, anto su formula nobo ta bay linea recta contra nos ley di compatibilidad, pasobra mester cuminsa cu full un trayecto di un destaho publico nobo.

Entre tanto minister ta anuncia cu aki lo bay duna un prolongacion di 3 luna, a pesar cu defacto e destaho a cera diabierna ultimo. Cu otro palabra a cuminsa cu trayecto nobo. Pregunta ta si e modus operandi di Otmar ta un decision di gabinete Wever-Croes completo? Of ta laga esaki atrobe completamente den man di e minister so? Parlamento a wordo consulta den esaki? Kico Parlamento su pensamento ta?

UPP ta spera, cu un decision asina importante, no ta keda na minister so. Sigur no despues cu segun e minister mes, e 27 companianan cu a participa na e RFI na januari ultimo ta esunnan cu a yuda gobierno (lesa minister Oduber) yega na e decision cu e W2E ta e miho solucion pa Aruba, bay resulta den un “onderhandse aanbesteding”, dunando e minister asina chens pa bolbe manipula y pa e por otorga e proyecto di “Sprookje” aki na un otro privilegiado!!!

 

LEAVE A REPLY

Please enter your comment!
Please enter your name here