Nada no ta asombra mi mas, pero mas bien ta indignami inmensamente ora mi wak con constantemente e “octopus” y “scorpion” manera un spirito, apesar di ta “opgelokt”, den dia cla ta wander den cocolishi y den nos Parlamento, cu hasta berguensa mi tin di skirbi esaki cu un hoofdletter.

Pa hopi tempo mi a keda keto, ya cu mi no ta wak cu nada mas ta bay cambia y cu toch “nobody cares”! Pero asina mes, mi curpa ta cuminsa grima, ora mi sigui wak kico ta sosodiendo, y parce cu tur cos ta wordo tapa na un manera nechi, mientras cu financiadornan di campaña ta keda probecha.

Ya caba riba 23 di juni 2021, un aña pasa prome cu eleccion, mi a entrega un di 3 rappel na OM pa loke ta mi keho contra Otmar Oduber den e caso di compra corupto di e incinerator chikito. Na e ocasion aki mi a amplia mi denuncia contra di director di DOW, e ministernan demisionario e tempo ey, esta prome minister (como minister di infrastructura) y minister di finansa.

Esaki pasobra, despues cu e compania CTC na 2018, por medio di corupcion di dia cla di ex minister Otmar Oduber, a haya un contrato lucrativo via di un “onderhandse aanbesteding”, nos por a mira cu abase di un argumento fofo di director di DOW, cu na Aruba no tin ningun otro compania of hende cu por opera e incinerator aki, ta conseha minister di infrastructura di e tempo ey, esta prome minister demisionario, net prome cu eleccion, firma un otro contrato lucrativo y miyonario cu e mesun compania CTC, cu no por a ni start e incinerator y ni a cumpli cu su trabou riba Sero Teishi, pa bay handle e incinerator pa DOW.

Anto esaki despues cu DOW a kita e mesun incenirator for di SERLIMAR, pasobra nan si lo tabata por a opera esaki. Y djey ta cambia rumbo y ta conseha otro. E director aki ta conoci cu e ta baila na cualkier tono di un minister!

 

Y lamentablemente e minister presidente actual y e tempo ey demisionario a scohe sin ningun clase di destaho pa regala e compania aki e contracto miyonario. Na september di 2021, pa ser exacto dia 5, mi pone den un comunicado, cu mi ta spera cu e gobierno nobo, cu tur dia ta papia di integridad, para e “miskoop” corupto aki. Mi a bisa tambe, cu “bira cara pa esaki, mescos cu e consehero principal di Otmar Oduber a haci y ta wordo recompensa cu un posicion clave rond di minister presidente actual, lo nifica cu nada ta bay cambia y cu ta e pueblo di Aruba un biaha mas lo bay paga miyones pa algo cu no ta sirbi, djis pa complace un sponsor di Otmar Oduber”. Y mi a adverti e minister nobo di partido RAIZ, cu haciendo esaki, e ta forma parti di un gobierno nobo cu TAMBE ta uno NO-INTEGRO!

Y kico mi ta mira? Siman pasa diabierna, CTC ta haya 7.5 miyon florin pa opera e incinerator pa cinco aña. Di un banda no tin fondo pa salba SERLIMAR, pero si un compania cu a demostra di no por deliver, ta haya atrobe un regaldo. Y e biaha aki defendi na grandi pa minister Arends y cu ningun cuestionamento di parti di e fraccion di RAIZ. Cu cara seco minister Arends ta defende algo cu otronan a compromente nan mes cu ne, pero awor, hunto cu Otmar, min pres, minister di Finansa, y director di DOW e ta birando complice di fechorianan cu a tuma lugar. Hasta mi ta contemplando pa den e dianan aki bolbe haci entrega di un rappel, na unda esaki atrobe lo por wordo amplia contra di minister Arends. E tempo ey mi a manda tur e pruebanan pa e minister nobo ey tambe. Pero awor, sin ningun clase di destaho publico den e caso aki. Y es mas CTC no ta core ningun riesgo pa loke ta planta, pasobra ya caba e planta ta paga dor pais Aruba y ta den man di DOW. Y conforme articulo 9.2 di e contracto lucrativo aki te hasta ta wordo exonera pa cualkier daño.

Mi pregunta ta, esaki ta INTEGRIDAD???? Minister Arends no a acerca nan ex-candidato Koopmans, kende tambe tabata hefe di SERLIMAR pa puntre kico tur a bay malo cu proyecto di incinerator chikito di CTC? Pero cu e acto aki, por medio di legislacion, Minister Arends ta bira complice, dor di purba tapa bagamunderianan cu a tuma lugar.

Di berdad, tin biaha mi kier bisa ta basta, pero e tipo di situacionnan aki cu ta presenta, ta pone mi no por keda keto!

LEAVE A REPLY

Please enter your comment!
Please enter your name here