Den e verslag pa loke ta trata e dos leynan di consenso di Reino COHO y RAft cu a keda manda Hulanda dia 20 di mei 2022, mi a haci varios pregunta y a duna comentario, critica y sugerencia pa cambio. Un punto cu mi a duna hopi atencion den e verslag ta e normanan stipula den e ley di consenso di RAft (Rijkswet Aruba financieel toezicht). Den e articulo aki mi lo bay amplia riba e e topico aki.

Manera mi a indica caba den un comunicado anterior, esta parti I, e normanan stipula den RAft ta irealistico y inalcansabel. Mi a trata entre otro e parti cu Hulanda ta exigi Aruba pa mantene normanan presupuestario y financiero for di prome cu e pandemia. Hulanda ta haci esaki sin tene na cuenta e impacto real di e pandemia y e desaroyonan mundial actual, manera guera entre Rusia y Ukrania.

Banda di e opinion cu e normanan mester keda miho defini, awe mi kier para keto na e hecho cu a keda subraya den nos verslag cu mester tene debido cuenta cu e influencia cu e normanan irealistico tin riba e grado di recuperacion di entre otro nos ‘schuldquote’. E punto di salida a base di cual a stipula diferente norma a cambia drasticamente door di e pandemia. Contrario na indicacionnan na 2018/2019 den e añanan nos dilanti nos ‘schuldquote’ sin duda lo sigui aumenta, esaki lo ta mas halto cu e limite critico stipula pa IMF pa e region di Caribe pa e proximo añanan.

Esaki sigur no ta nada straño mirando cu e propio IMF a indica cu Aruba ta e isla mas afecta den Caribe door cu nos ta depende principalmente di turismo. Door di esaki mes nos a indica den e verslag cu nos ta di opinion cu e componente aki tambe mester keda inclui den e analisis cu nos ta boga pe. Esta e analisis pa stipula normanan basa riba nos realidad actual y metanan di recuperacion. Nos a enfatisa y a haci e pregunta pakico Hulanda no ta tene cuenta cu nos situacion real y ta keda persisti na mantene na normanan bieu y irealistico.

Otro aspecto importante señala tambe pa Raad van State di Hulanda (RvS) ta e peliger di obstruccion di inversion door di e normanan presupuestario. Segun RvS, e standaardnan presupuestario mester ta realistico y alcansabel. Debi na e normanan presupuestario fiha pa Hulanda cu ta hopi ambicioso, sigur ta existi e riesgo cu nan lo hunga un impacto negativo riba nos capacidad di crecemento economico.

Pa fortalece e economia di Aruba y haci’e mas robusto, RvS ta indica cu Aruba mester bira menos dependiente di turismo. Pa logra diversificacion di nos economia nos lo mester realisa cierto inversionnan y e normanan actual sigur ta obstaculisa esakinan. E scenario aki tambe ta indica cu e normanan cu Hulanda ta mantene ta irealistico. Pa es motibo aki mes, den nos verslag a enfatisa e peliger aki y a puntra Hulanda pakico nan ta keda mantene normanan cu ta tranca crecemento di nos economia y perhudica nos recuperacion.

Manera mi a termina mi comunicado anterior ainda no a ricibi contestacion riba nos pregunta y criticanan for di Hulanda pero mi ta spera cu Hulanda lo tene cuenta cu esakinan y realisa cu e postura aki no ta uno corecto y sigur no ta beneficia recuperacion di nos pais.

LEAVE A REPLY

Please enter your comment!
Please enter your name here