Diamars 5 di november lo mester a bira e dia cu porfin despues di mas di 3 aña e pueblo manehado lo mester a libera su mes di un congestionamento di dia aden y di dia afo. Ayera lo mester ta e dia cu tur hende cu ta haci uzo di e careteranan di Aruba lo mester a sinti e alivio di situacion di trafico insoportabel. Pero den e prome oranan y henter dia, nos por bisa cu esaki no a resulta di ta e caso.

Un congestionamento cu mester a wordo resolvi pa esunnan cu ta bin di parti pariba di nos isla y cu ta pasa den Playa, a wordo traspasa pa varios puntonan di congestionamento cu ta igual of pio bou di e periodo di construccion di WVB.

Mientras cu e minister actual di Infrastructura a gaba cu e trabou di Mota Engil, di DOW, di ex-minister di gabinete Eman, y na mes momento bisando cu a haci varios cambio riba e proyecto y percura pa mehora e producto, di otro banda nos ta haya politiconan di oposicion den Parlamento, cu ta causante di e debe astronomico cu Aruba ta horca cune ta claim e proyecto di WVB y mustrando cu aki pueblo ta wak unda su placa a bay.

Pa cuminsa ta trata di un proyecto cuestionabel, particularmente pa su calidad. Nos por a mira dos viaducto cu ta wordo bisa awor cu esaki ta di acuerdo cu normanan di construccion internacionalmente reconoci y acepta. Esaki segun DOW y e minister di Infrastructura actual. Recientemente nos por a mira cuanto parti di e proyecto a bay bou awa, unda riba e trayecto di Ponton un banda di caminda a keda completamente bou di awe. Anto nos flamante minister Otmar Oduber ta bay di acuerdo pa acepta cu e WVB ta disponibel pa uzo, indicando cu e aspectonan tecnico a wordo controla y cu awor ta cuminsa e proceso di landscaping. Kico esaki kiermen? Cu nos ta bay di acuerdo cu loke tecnicamente y e calidad a wordo entrega ta OK? Pues aki den cierto sentido gobierno por medio di e minister ta bay di acuerdo cu entrega parcial di e proyecto, cu lo nifica tambe cu lo no por tin claim den futuro? Di e forma aki tambe e minister anterior ta wordo absolvi di cualkier decisionnan malo cu lo por a wordo tuma pa loke ta e proyecto aki?

E otro punto ta trata e suma cu nos tin di bay paga. Nos a wak proyectonan grandi manera

Hospital, Green Corridor y awo WVB, a resulta den proyectonan cu nos pueblo mester cuminsa paga awor aki. Director di DOW ta gaba con el a bay Washington pa siña kico ta e sistema di PPP, mientras cu ya caba riba scala chikito nos tabata tin esakinan na Aruba. Awor aki e PPP-nan aki tur a resulta den debenan monstruoso cu tin di wordo paga awor padilanti, y no manera AVP, Mike de Meza y Benny Sevinger y nan gang di Alibaba ta bisa cu pueblo por wak unda nan placa a bay. E proyectonan aki NO ta hinca den e debenan astronomico cu Gabinete Mike Eman a laga atras, sino awor nan ta bin acerca.

Pesey nos ta bisa, na momento cu AVP y POR cada uno ta claim e proyecto y unda e minister hasta ta elogia su ex-colega, nos ta spera tambe cu AVPOR pa claim cu e debenan grandi cu a hinca nos pueblo aden tambe ta di nan. Esta di Mikenan, Benny y Otmar. Loke a grita tambe den Parlamento, cu pueblo lo mester bay paga esaki cu orguyo.

Nos ta pidi e pueblo pa wak loke a wordo priminti, y loke realmente nos ta haya. Wak tambe loke nan ta cobra pe y loke realmente nos ta paga pa loke nos a haya. Mientrastanto hopi ta e bario- y districtonan cu tin di bay siña biba cu congestionamentonan parti mainta, merdia y atardi, ora ta transita den e areanan druk net pafo di Oranjestad.

Ayera tabata un dia di hubilo sigur pa AVPOR, tanto pa Otmar Oduber cu a habri e caminda como minister, y Benny Sevinger cu a habri e caminda como ex-minister!

 

LEAVE A REPLY

Please enter your comment!
Please enter your name here