Bootcamp : Director hoben no a wordo culpa di nada aña pasa

Ora cu menciona e palabra ‘bootcamp’ di biaha hopi ta esunnan cu ta corda riba e situacion cu a tuma luga aña pasa unda cu yen di acusacion a wordo haci den direccion di Aruba Boot Camp Foundation. Primordialmente pa nan manera di ‘stret’ e muchanan y e hecho cu e luga tabata dirigi pa un hoben e tempo ey di 19 aña. A pesar di esaki e no a wordo culpa di nada y a sigui cu su trabounan y ta canando caminda legal pa sucesonan di aña pasa, Director Gilbert Webb ta conta Bon Dia Aruba.

Opinion edad hoben

Tin hopi ta wordo bisa di bo edad, cu bo ta hoben bo mes y pues kico bo lo por sa tocante yuda otro hobennan cu problema di comportacion “Locual cu ami ta djis bisa ta cu ami ta sinti cu ningun hende ta step up y lanta pa yuda nos hobennan, pues ami si ta bin dilanti y haci esaki. Ami ta yuda nan manera un ruman y si otronan no ta yuda nan ami ta scoge pa wak pa mi y no otro.” Aworaki Sr. Webb tin 20 aña.

Inscripcion

Inscripcion pa Aruba Boot Camp Foundation lo habri dia 2 di april na Oficina situa den Caya Betico Croes 111, scuins dilanti di ex hotel Victoria na final di caya grandi di 3or di atardi te cu 7or di anochi. Esakinan ta pa muchanan entre 12 cu 17 aña. E structura di e bootcamp lo ta mescos cu a conoce aña pasa, pero e bootcamp lo no ta na mesun luga cu aña pasa. Segun Sr. Webb e edificio ainda no a wordo haci publico. Despues di inscripcion lo cuminsa screen e muchanan pa despues haci seleccion di e muchanan pa cuminsa di nobo cu e programa. Aruba Boot Camp Foundation ta enfoca riba siña hubentud norma, balor, respet y lealtad y asina ta yuda hobennan cu ta den mal caminda, tambe cu tin problema cu mal comportacion of cu tin dificultad  pa comunica cu otro. Tambe Aruba Boot Camp t’ey pa brinda e mayornan un man den e guia di nan yiunan.

A puntra Sr. Webb kico ta e meta di e cantidad di mucha cu kier tin den e programa. El a splica cu aña pasa den total a yega casi 50 mucha, pero e cantidad di mucha no ta importante. Tambe a puntra Sr. Webb si e ta kere cu e ‘mal fama’ cu e bootcamp a haya aña pasa lo influencia e cantidad di inscripcion di e aña aki. El a bisa: “Aruba tin hopi mayor cu ta contra y tin hopi mayor cu ta pro. Esunnan cu ta pro, ta esunnan cu ami ta sigui cu nan. Nan a mira y sa e realidad di e bootcamp, esunnan cu ainda ta mente negativo lo por mira pronto con e situacion ta hinca den otro ora cu tin resultado di corte. Ami ta keda positivo y mi ta kere ta bay tin bon reaccion.” Muchanan cu por ehempel tabata den e bootcamp aña pasa caba, por inscribi atrobe y segun Sr. Webb ya algun mayor a yama caba.

Sr. Webb ta e director di e luga (Aruba Boot Camp Foundation) cual e ta maneha hunto cu un directiva cu ta consisti di mas personanan mayor cu ta mantene nan mes mas priva y lo tin trahadonan nobo e aña aki, pero e  nivel di ‘streng’ lo ta mescos, pasobra esey a funciona aña pasa, el a bisa.

Claridad situacion aña pasa

“E caso tabata cu Voogdijraad a haci peticion na Ministerio Publico pa drenta den e luga y bay cu tur e muchanan. A bin manera un problema cu nan a yega drenta cual ami no a acepta pues mi a bay na mi abogado. Mi a bisa mi abogado pa acerca Ministerio Publico cu un carta, splicando locual cu a tuma luga y pa nan hustifica si esaki ta corecto of incorecto y nan no por contesta nos si nan tabatin autoridad pa drenta e luga. E ora ami a lanta caso contra nan, cual caso ta andando y ta tardando hopi.” Sr. Webb a sigui bisa cu e caso ta contra Ministerio Publico, Voogdijraad y Pais Aruba. Despues di e suceso aki e bootcamp a sigui den priva. E muchanan cu tabatin na e momento ey a sigui traha cu nan priva te cu esey a termina. Segun Sr. Webb esakinan a tuma luga juni 11 pa 6or di mainta.

Segun el a sigui splica e no a wordo prohibi pa tin un luga of habri esaki di nobo, te hasta cu Dowers a publica den corant cu e por habri bek na un otro sitio, cual e no a haci y a opta pa bay corte pa nan. Sr. Webb a mustra riba e hecho cu tur cos ta legal y e ta registra na Camara di Comercio. “Ministerio Publico ta esun cu no a actua legal y no tabatin autoridad pa subi e tereno y bay cu e muchanan, pasobra via di un contract mi ta responsabel pa e muchanan.”

Mi a duna nan tur tempo, for di juni te cu aworaki pa trece prueba di con nan a actua den e situacion aña pasa. Mi no a wordo culpa y tampoco castiga pa nada, awo ta mi tempo pa atende cu e situacion, Sr. Webb a bisa.

Aña pasa

Si wak bek un poco na aña pasa tabatin muchanan cu a bisa cu nan tabatin cu come pan cu beskem, a wordo muha cu acido, muha cu awa marduga, e luga no tabata limpi y segun algun potret hasta por a bisa cu e no tabata higienico.