Durante e ultimo dianan aki, Puerto Rico a keda afecta pa via di dos temblor cu a causa hopi daño den e isla, e ultimo tabata trata di 6.8 den scala Richter, esun mas dañino cu a pasa den mas di un siglo.

Pa via di esaki, Caribbean Weather Center den su pagina di Facebook a publica un mapa di Corsou na unda nan ta splica e areanan cu tin riesgo mayor y esun cu mester ta na alerta, ademas di esey nan a informa cu nan no tabatin e mapa di Aruba y Boneiro pa igualmente informa riba e riesgonan cu e islanan aki por tin.

Rino Hermans di Bureau Rampenbestrijding Aruba ayera a duna un conferencia di prensa na unda el a splica cu desde 7 di november nan ta monitoria e frecuencia y magnitud cu ta subi, internamente nan tin un procedura y no por alarma e ciudadanonan si no ta necesario.

Un bes cu un temblor ta pasa di 6, nan tin tres punto di atencion cu ta Puerto Rico, Monserrat y Grenada pa via di e volcan Kick ’em Jenny.

El a señala cu diamars mainta, nan a manda pa dienstnan pa nan por revisa nan plan y entrega un capacidad y necesidad den caso di un Caribbean tsunami, loke ta considera como un tsunami local, pa motibo cu internacionalmente e comision di tsunami ta considera esey como algo local.

Hermans a expresa cu esey ta duna Bureau Rampenbestrijding poco alerta pa comunica na tur hende, el a sigura cu esaki tin un parti di preocupacion, pa motibo cu hende tin cu compronde cu ora e temblor tuma luga e señal tin cu bay pa Hawai, di eynan tin cu analis’e y si tin boei di tsunami cu mester wordo manda pa traha e boletin pa mand’e pa Meteo Aruba.

Un temblor di Ponce, Puerto Rico pa Aruba ta dura aproximadamente 40 minuut pa e prome ola yega y nan tin 12 minuut pa alerta e comunidad.

Asina mes, el a manifesta cu desde 2013 nan ta uza Alert FM cu e personanan mester registra riba dje mirando den e dianan aki cu tin un atencion riba e situacion di Puerto Rico. Particularmente na Aruba si e personanan ta dos kilometer for di costa nan ta sigur.

“Tur indicacion cu nos ta haya ta indica cu nos ta sigur na Aruba, pero ta un situacion cu mester monitoria”, Hermans a comenta.