CAft den su comentario reciente riba e raportahe 3 pa aña 2021 di gobierno di Aruba, ta constata te fin di september un deficit financiero di Afl. 447 miyon pa e sector colectivo – Pais Aruba mas e entidadnan estatal designa – loke ta debi na e resultado positivo di e demas entidadnan.

E deficit financiero pa e sector ta segun e reporte Afl. 742 miyon, loke ta igual na 16 porciento di GDP. E deficit financiero pa henter aña segun e presupuesto aproba ta Afl. 775 miyon, pero lo por ta mas abao. A base di e consehonan duna pa CAft pa e presupuesto complementario 2021, y e cifranan di e reporte aki, CAft ta kere cu e deficit lo resulta mas abao na fin di aña.

CAft a conseha a base di e realisacion te cu augustus pa aumenta e proyeccion di impuesto indirecto y gobierno di Aruba a indica cu lo aumenta e beneficio adicional pa 2021 cu Afl. 49 miyon y ta basa esaki riba e ahustacion di e proyeccion di crecemento di 10,9 pa 13,9 porciento.

Entrada te cu fin di september a yega na Afl. 766 miyon, igual na 72% di e presupuesto complementario 2021. E impuestonan directo ta den linea cu presupuesto, y ta constata cu e contribucionnan pa e areglo di FASE a resulta mas abao cu e Afl. 12 miyon cu a spera, pa motibo di un contribucion limita di e entidadnan publico.

Den caso di e gastonan realiza ta mira un total di Afl. 1.263 miyon loke ta 75% di e presupuesto complementario. Den e categoria di Bienes & Servicio a realiza solamente 66%, loke lo conduci na menos gasto haci cu den e añanan anterior, segun CAft. Gastonan di personal lo yega na Afl. 423 miyon. Segun CAft e gastonan di personal lo keda alrededor di e norma di Afl. 427 miyon, pero ta observa cu Aruba mester haci un esfuerzo pa logra cumpli cu e norma di gasto di personal cu mester ta bahando nominalmente. Esaki lo hiba na un deficit mas chikito pa 2021 y lo percura pa debe di e pais no sigui subi innecesariamente. Pa loke ta specificamente e plan pa baha gasto di gobierno (BVP), ta constata cu ta cumpliendo cu e norma di e protocol di 2018. Sin embargo, esaki ta debi mas tanto na e reduccion cu 12,6% di e salarionan. Di otro banda no ta mira tanto accion pa loke ta e medidanan den cuadro di e BVP – te awor Afl. 3 miyon – compara cu tercer trimester di aña pasa. CAft un biaha mas ta pidi atencion pa ehecucion di e plan aki di gobierno di Aruba.

A constata a base di e control haci riba e subsidio di salario otorga cu a paga como Afl. 57 miyon di mas. CAft ta mustra riba e importancia di un proceso fuerte y diligente pa cobra e suma aki ya conseha pa termina e cobranza di e subsidio paga di mas pa mas tarda 1 di april 2022.

CAft ta conseha, a base di e reportahe aki y e recomendacionnan di e segundo reporte cu no a sigui, pa haci lo siguiente:

1. Cuantifica e medidanan di e BVP den e di cuatro y ultimo reportahe pa 2021 a base anual y relaciona esaki na e presupuesto (multi anual).

2. Mehora e suministro di informacion den e di cuatro reportahe encuanto e progreso y mehoracion di e maneho financiero, unda ta duna entre otro un planificacion di e investigacionnan parcial di e ‘nulmeting’ y e siguimento di e resultadonan di e investigacionnan parcial cu a ser haci caba.

3. Apela atrobe urgentemente cerca e entidadnan gubernamental pa transmiti e pagonan di e recorte di 12,6% riba e condicionnan laboral, pa Pais Aruba.

4. Den e futuro reportahenan mensual, inclui e progreso den e cobranza di e subsidio di salario paga di mas y termina e control riba e aña presupuestario 2021 pa mas tarda pa 1 di april 2022.

5. Inclui e subsidio di salario cu ta reclama, den e administracion financiero di e pais.

LEAVE A REPLY

Please enter your comment!
Please enter your name here