CAft cu sorpresa grandi…No fia mas pa subsidia desempleo…

Mientras cu hopi hende tabata pendiente di algun ‘vuurwerk’ for di reunion di Conseho di Ministro di Reino na Den Haag, encuanto e (in)cumplimento di e faltante 20 miyon florin di gasto di AZV cu no a corta ainda y ki consecuencia esaki lo tabatin pa e apoyo di liquidez cu gobierno di Aruba lo ta buscando pa continuacion di entre otro e ayudo di Fase y di subsidio riba salario, e sorpresa a bin di otro banda.

E colegio di supervision financiero CAft a sorprende, despues di a haci un ronda extenso di consulta cu e ministerionan, gobierno den su totalidad y varios departamento y otro gremionan interesa, cu e anuncio cu nan ta mira economia di Aruba ta recuperando asina bon, cu e apoyo na persona desemplea por cuminza bira un molester pa economia, pasobra e ta desanima hende di bay busca trabao, cu segun CAft tin disponible mirando e cantidad di cupo di trabao pa cual empresanan no por haya hende…

Naturalmente tin algo di berdad den esaki; tin hopi empresa, sigur den horeca, cu ta short na personal. Sin embargo, esey no ta henter e storia. Un di e problemanan ta cu durante e crisis a para henter e mecanismo di permiso relaciona cu trabao. Oficialmente mester duna prioridad na e trahador local cu mester di trabao. Pero e trahador Arubano ey ta disponible y dispuesto pa traha cualkier trabao? Si esey no tabata asina pa varios decada, di repente awor si trahador local ta bay solicita y haya trabao den e puestonan aki unda pa añas apenas tabata mira hende local emplea? Ta bin acerca e fenomeno di trabao ilegal. Esaki den dos sentido, di e trahador local cu ta haya empleo temporal sin cu su doño di trabao ta cumpli cu su obligacionnan legal, y e grupo di stranhero cu ta trahando sin ningun documento y cu sigur no ta registra tampoco cerca e instancianan oficial. Gobierno di Aruba a duna inicio na un cambio di maneho pa purba minimaliza e fenomeno aki? Si nan a hacie lo ta bon scondi pa ningun hende ripara… Si gobierno dicidi aboli e areglonan aki, mester observa cu nada no a mehora den e combatimento di trabao informal, di local y di stranhero.

Pero awor e aspecto financiero na nivel di gobierno. Loke CAft ta recomenda ta pa aboli e areglonan di ayudo menciona, y no mester fia mas, ni di Hulanda ni di otro fuente. Awor, nos a mira e anuncionan caba di prestamo riba mercado local a base di bono ultimamente, pero en total nos no ta sigur cu esey ta e sumanan necesario pa cubri e programanan di ayudo menciona, si continua cu nan. E punto mas fastioso ta cu e recomendacion di CAft ta pone gobierno den un posicion incomodo, unda e trabao di termina ayudo lo mester bin di gobierno… Y mirando cu gobierno no ta parce di tin ningun gana di implementa ningun medida impopular, anto esaki tambe ta bay bira un batata cayente dentro di poco, banda di otro. Pasobra den e rueda di prensa di ayera e Colegio di Supervision a trece dilanti tambe como nan obhecion mayor e hecho cu gobierno a formula un plan di maneho pa reduci e aparato publico, e no asina conoci BVP – pasobra nos no a hay’e pa mira nunca – pero banda di cumplimento cu e maximo di gasto total, nunca a implementa nada di e obhetivonan pa structuralmente baha gasto. Presidente di CAft a menciona como ehemplo e ‘periodiek’ automatico di aumento salarial, pa tur ambtenaar, pero cu tur aña ta trece cune un aumento automatico di gasto di e aparato. Berdad ta cu riba e tipo di tereno aki, nos ta na fin di 2021, y nunca a mira nada ni proponi, te pa mira algo concretisa.

Es mas, atrobe CAft ta urgi henter e lista di reforma cu mester tuma lugar segun e Landspakket y su Uitvoeringsagendanan, pero riba pregunta di Bon Dia Aruba si a mira algo concreto realiza caba, e contesta tabata cu “pronto si lo mester cuminza cu esaki”. Esaki ta nada mas cu ilustra y enfatisa nos critica riba gobierno cu ta aparenta di haci nada mas cu pusha tur cos ‘pa futuro’… CAft sin embargo ta indica claramente cu e falta di diligencia di gobierno tin su limite. Di un banda tin e acuerdonan pa un presupesto balanza na 2022 y un presupuesto 2023 cu por lo menos 1% di GDP na reserva, pa gradualmente cuminza baha e debe gigantesco, cu pa fin di 2021 lo ta na Afl. 5.600 miyon, mas cu 100% di GDP. Sigui paga salario manera nada no a pasa, no ta un opcion, segun CAft, anto net den e dianan aki cu e exigencianan sindical a cuminza lanta cabez atrobe, pasobra nan ta kere cu ‘tin cos di haya’.

Finalmente CAft a expresa e deseo, ripti varios biaha, cu gobierno mester cuminza cumpli cu Constitucion y ley y entrega presupuesto na tempo. Henter e cos aki ta parce un ehercicio ilusorio pasobra manera e presidente di CAft mes a comenta: “Aruba a crea un tradicion caba di entrega presupuesto laat”. Nos lo kier añadi e cuentanan anual tambe, asina cu ta henter e sistema financiero gubernamental mester un ‘shake up’. Por ta cu Hulanda por duna esaki prioridad?