Recientemente Minister Endy Croes a ricibi bishita di directornan di NHL Stenden Hogeschool di Leeuwarden. E directornan ta na Aruba y a probecha di e oportunidad pa reuni cu Universidad di Aruba y cu Directie Onderwijs.
E mandatario di enseñansa a bisa den un comunicado di prensa cu NHL Stenden Hogeschool di Leeuwarden tin diferente campus na entre otro; Hulanda, Bali, Indonesia, Sur Africa y Italia. NHL Stenden Hogeschool ta haci tipo di ‘grand tour’ of stage y nan tin diferente programa. Ora cu e studiante ta den su tercer aña di estudio e por scoge pa haci su stage den exterior. Minister Croes a sigui bisa cu ta negociando cu Universidad di Aruba y Gobierno pa asina purba cristalisa pa ora e studiante ta den su tercer aña e por scoge pa haci su stage na un di e otro paisnan.
‘Alrededor di mil studiante pa aña ta haci uso di e oportunidad aki y kier inlcui Aruba den un programa asina’ e mandatario a expresa. Si logra yega na acuerdonan nos lo cuminsa cu un cupo di 24 studiante na 2022.
E studiantenan por haci nan stage sea den 10 siman of un semester completo cu ta 20 siman. E lo bira un programa cu nos lo kier visualisa, ohala cu por cuminsa otro aña na luna di februari 2022 y despues continua cu e di 2 grupo na september 2022. Esaki ta un bunita oportunidad pa hunto cu profesornan di otro universidad den ‘partnership’ cu Universidad di Aruba, Directie Onderwijs y Gobierno di Aruba nos por duna sosten na proyectonan asina.
