Ministerio di Transporte, Integridad, Naturalesa y Asuntonan di Adulto Mayor ta bezig organisando un caminata pa conmemora e siman di integridad cu lo tuma luga for di 5 pa 9 di december di 2022.

Pa cu esaki, mediante un comunicado ministerio di Integridad a informa comunidad cu den colaboracion cu Fundacion Parke Nacional Arikok ta invita comunidad di Aruba pa participa den e caminata “Walk for Integrity, Walk for Nature” cu lo tuma luga dia 9 di december.

Participantenan mester yega na e luga for di 4.30 di atardi y e caminata mes ta bay cuminsa for 5or di atardi na FPNA Visitor Center cu e ruta for di Visitor Center te Cunucu House y bin bek loke ta ekivalente na 3 kilometer.

Registracion a cuminsa caba riba e website www.integrityweekaruba.org of riba e Facebook page di Minister Ursell Arends ken ta esun encarga di e cartera aki, participacion ta gratis y ta inclui un T-shirt dry fit.

“Integridad ta presente den tur parti di nos bida. Integridad ta aplica na naturalesa tambe, ta nos deber pa respeta y coexisti cu naturalesa. Ban honra nos compromiso cu integridad, honra naturalesa y uni na e caminata aki”, a informa.

Bureau Integriteit Aruba a bira noticia den ultimo simannan cu e reactivacion di dje unda gobierno na luna di october tabata buscando pa introduci dos rol importante di empleadonan publico pa fungi como vertrouwenspersoon integriteit y interne onderzoeker.

Integridad den departamentonan gubernamental ta sumamente importante pa bienestar di nos pais y comunidad. Pa por logra esaki na un manera efectivo ta rekeri diferente instrumento unda nan lo tin cu haci un opleiding y fungi como VPI of IO.

Un VPI lo fungi como un punto di contacto pa empleado publico cu tin sospecho di un violacion di integridad na su trabao.

Un IO ta conseha of guia ora di haci un investigacion di echonan relaciona cu un sospecho di violacion di integridad i den algun caso lo ehecuta e investigacion su mes.

Pa finalisa, nan a señala cu ambos rol ta contribui na un aparato gubernamental integro y un ambiente di trabou sigur.

LEAVE A REPLY

Please enter your comment!
Please enter your name here