Campaña nobo pa protege nos beachnan y duinnan

Ayera  un aliansa nobo entre ATA, Ahata,  cuerpo policial (KPA) y Blue Blocks Aruba a keda anuncia  pa conhuntamente bin cu un campaña pa protege nos medio ambiente, muy specialmente nos beachnan y duinnan.  

Nan lo pone un total di 19 borchi rond di nos isla den diferente zona pa e hendenan, tanto turista como local, tene cuenta cu nan comportacion pa evita daño den nos medio ambiente.  Pero tambe nan lo haci uzo di nan facilidad digital pa informa debidamente riba proteccion di nos recurso natural.

Siguridad
Directora di ATA, Ronella Tjin-Asjoe-Croes a declara na Bon Dia Aruba cu sin duda algun nos beachnan ta parti di e tres pilar cu ta basa nos turismo, hunto cu amabilidad di nos hendenan y siguridad di nos isla. Aunke aspecto di siguridad ta sigui score hopi bon ainda; mester ta auto critico cu ultimo tempo a bin tumando luga incidentenan cu ta afecta siguridad riba isla.

No ta importa con nos ta desaroya como destino, pero nos playa ta keda nos recurso natural mas importante y esey ta loke ta haci nos hopi famoso tambe”, e directora ta remarca tambe.

Inversion y proteccion
Sra. Tjin-Asjoe-Croes ta bisa cu pa ATA ta importante pa duna atencion na nos medio ambiente y nan ta haciendo esaki di diferente manera. E biaha aki hunto cu e partnernan menciona ariba a keda anuncia diferente iniciativa riba proteccion di nos playa. Den nan plan di maneho ATA  ta inverti den nos playa den diferente manera, entre nan limpiesa di lama for di Nikki Beach  te cu e area na haltura di cas di Gobernador.  E aña aki nan lo continua cu e tipo di trabou aki for di area maritimo di Hyatt hotel te cu hotel Ritz Carlton.

Durante e conferencia di prensa ayera a wordo cuestiona cu un partner tambe importante como Serlimar no tabata presente, ya cu mester di mas bari di sushi den sitio frecuenta pa nos turistanan.  Directora di ATA a bisa cu nan ta inverti den diferente bari sushi den area di nos playanan.  Nan tin un colaboracion estrecho cu Serlimar , te hasta nan ta uni anualmente pa nan accion di limpiesa di barionan. Tambe compania priva ta duna asistencia na Serlimar den su totalidad.

Borchinan
ATA ta invertiendo den diferente borchi, y nan a exhibi algun di e borchinan den  idiomanan Ingles y Spaño. E borchinan aki ta duna informacion y conscientisacion  di e reglanan di uzo di nos playanan. Tambe e parti di nos duinnan y e conducta cu e personanan mester tene cuenta pa proteccion di e santo blanco. E borchinan aki lo instala nan den e proximo simannan.

Di parti Ahata, entre otro Astrid Muller a informa cu nan a tene reunion cu e diferente companianan di car rental. Tambe cu ATA y polis pa duna un parti di e conscientisacion riba conservacion di nos duinnan particularmente, ya cu esaki ta un di nan compromiso cu Ahata a bin varios aña pasa cu ne.  El a expresa su satisfaccion di por bin bek riba e parti aki pa evita e coremento di vehiculo di motor riba e beyesa natural aki. El a remarca cu e santo y e vegetacion cu ta crece riba e duinnan ta di suma importancia pa e “salud  di e duinnan”.  Nan a pidi e companianan di car rental pa yuda nan den e aspecto ey.

Blue Blocks Aruba ta un organisacion lanta pa un grupo di boluntario cu a bin cu e iniciativa di pone blokinan cu un leyenda na fabor di proteccion di nos beach y duinnan na Noord. Nan a traha baricada di un manera uniforma.  Ainda nan ta trahando riba nan statuto pa e por bira un fundacion oficialmente. E organisacion aki tambe ta forma parti di e campaña pa proteha e beachnan y duinnan.

You May Also Like

Casonan di difteria na Venezuela ta bati bel cerca nos

E casonan reciente di difteria detecta den e pais bisiña di  Venezuela ta bati bel ...

Ahata desapunta cu manera con a introduci aumento di salario minimo

E aumento di salario minimo a bini como sorpresa pa algun gremio di comercio. ...

14Mrt, JO, ArubaDoet.jpg

CEDE Aruba: ”Aruba Doet 2016 tabata exitoso y basta productivo”

Aruba Doet ta un proyecto di CEDE Aruba hunto cu Oranje Fonds cu a ...

editorial

Tempo pa tramita presupuesto 2016 ta bira cortico

Ainda presupuesto no a bay Raad van Advies! E prome señalnan di un proximo ...