Crisis economico y social na Venezuela a impulsa mas di 12 mil persona pa huy pa Brasil, den buskeda di cuminda y medicina, segun un informe di organisacion Mericano Human Rights Watch, cu a ser publica diamars. E informe ta invita Caracas pa tuma medida di alivio.
“Ta existi un aumento di cantidad di Venezolano cu a huy for di Venezuela, pa motibo humanitario, den buskeda di cuminda y medicina cu no ta disponibel”, Jose Miguel Vivanco, director pa Merca di HRW a splica.
Hopi di nan ta huy tambe pa motibo di nivel halto di inseguridad na e pais, “ caminda e norma cu ta reina ta e impunidad, pa hende cu ta victima di un hecho violento, cu por bin for di un pandiya of di un agente di estado”, Vivanco a bisa.
Segun e organisacion HRW, mas di 12 mil Venezolano a drenta y asina nan a permanece na Brasil desde 2014, na estado di Roraima, na frontera cu Venezuela. E cantidad di persona cu tabata drenta den un aña a aumenta 5 biaha durante e diesun prome luna di aña 2016, te na un averahe di 7150 entrada. E informe di campo ta recoge testimonio di migrante Venezolano y di autoridad di Brasil na estado di Roraima.
E cifra di Venezolano cu ta emigra y cu ta solicita asilo, a aumenta tambe na paisnan manera Argentina, Canada y Estadonan Uni, HRW a splica. Vivanco a haci un yamado na e paisnan di e region, pa implementa medida di presion contra gobierno di Venezuela, pa asina nan haci “cambio y ahuste dramatico”, como tambe reconoce e crisis y haci un solicitud abierto pa ayudo, na tur entidad humanitario internacional como tambe Organisacion Panamericano di Salud.
“E demandanan aki mester ser formula pa estadonan miembro di OEA, organisacion di estado Americano,” Vivanco a splica.
E crisis Venezolano a bira pio riba dia 1 april, ora cu miles di Venezolano a cuminsa cu hopi protesta alrededor di e pais, y pa asina demanda un proceso di eleccion. Manifestacion a caba cu disturbio entre manifestante y forsanan di seguridad, lagando cinco hende morto, hopi herido y mas di 200 persona deteni.
