Candidatonan pa Gobernador no a wordo presenta ainda

Ya caba Aruba ta pensando pa un otro Gobernador, ya cu e gobernador actual lo t’ey ainda pa algun luna. Pa un persona bira gobernador, kende ta representante di Reino Hulandes, e lo mester ta uno di Aruba. Candidatonan pa Gobernador ta wordo presenta pa gobierno, pa asina Hulanda aproba e candidato.

Ainda gobierno no a cana e proceso di presenta candidato pa e posicion di Gobernador, pero Prome Minister Mike Eman a papia cu Minister di Relacionnan Interior y Asuntonan di Reino, Ronald Plasterk, riba e profiel, pero tambe kico nan ta buscando den un Gobernador nobo. Segun e mandatario, nan no tabata tin diferencia di opinion riba kico nan ta buscando pa un Gobernador nobo. Na momento cu gobierno keda cla cu e nombernan di e candidatonan, esaki lo wordo duna na gobierno di Reino pa asina por yega na nombra un Gobernador nobo otro aña.

Te cu na e momentonan aki Gobernador Sr. Fredis Refunjol lo ta e representante di Reino Hulandes, pero e lo t’ey te cu e luna di mei 2016. Sigur gobierno ta kere cu lo tin tempo di un par di luna pa cana e proceso aki den un forma debido. Prome Minister ta indica di ta hopi contento tambe cu di parti di gobierno di reino ta pone awor un atencion hopi special na con ta cuida e Gobernadornan den futuro pa nan no haya nan den e situacionnan cu gobierno a haya nan mes aden. Un biaha mas door di interpretacionnan di reglanan cu a pone un peso y un carga mucho pisa riba e posicion di gobernador poniendo e den hopi dificultad. Cu e experiencia ey tambe tabata uno importante pa salvaguardia e honor y dignidad di instituto gobernador.

Ora ta papia di profiel pa ta un Gobernador, e mandatario ta pensa cu semper e prome aspecto di mas principal ta cu e persona ta intachabel, ta un persona cu tin e respet den comunidad di Aruba, pero tambe e tin conocemento di e forma con Aruba ta wordo goberna, kico ta e principionan importante di e organisacion di Aruba y e temanan cu ta regarda hopi gobernacion, relacionnan den Reino. Temanan hopi importante cu un Gobernador ta duna contenido na dje tambe como representante di Reino Hulandes na Aruba, pero tambe como hefe di gobierno di Aruba. E persona mester tin conocemento di e reglanan di gobernacion di e sistema constitucional di Aruba, pero tambe di e mundo mas amplio na cual Aruba ta pertenece. Loke ta sigur ta cu e persona aki mester por gosa di hopi aprecio, di hopi autoridad moral den comunidad.