Tin un degradacion continuo di e comunidadnan caynan di Aruba, hasta cu algun comunidad di coral a desaparece completo for di algun area rond di e isla. Esey ta conclusion di un rapport extenso cu Carmabi a haci pa Aruba y cu tabata den man di Gobierno desde 2019.

Segun e rapport, tin un cantidad di indicado cu ta sugeri degradacion continuo. E desaparicion di e organismonan cu ta traha e caynan, señalnan di sobre pesca, e presencia enorme di polucion riba tera (cu ta resulta den lama) y presencia di gruponan organico cu tin un impacto negativo riba crecemento di coral, manera alga y asina yama ‘cyanobacteria’ tur ta indica cu e caynan ta experiencia un caida den estado di salud y abundancia di coralnan. E hecho cu calcificacion nunca ta positivo, locual ta yamativo ta cu segun e estudio ni un di e areanan di coral cu a keda analisa ta creciendo. Esaki ta algo cu ta hopi preocupante y indicativo di erosion amplio.

Segun Carmabi, casi no tin informacion sistemico riba e estado di ecosistemanan maritimo na Aruba. Es mas, un rapport cu UNDP (United Nacions Developmental Program) a laga traha a bisa cu tin practicamente falta di informacion total riba recursonan ecologico di Aruba, su capacidad di carga, limitenan di cambio aceptabel y informacion riba e nivel existente di presion medio ambiental. Gobierno como tal a acerca CARMABI, e fundacion di Corsou specialisa den investigacion marino tropical, pa ehecuta un estudio base den colaboracion cu e Scripps Institution of Oceanography di Merca y tambe e Global Coral Reef Monitoring Network, tambe di Merca.

Capacidad di carga

E rapport ta inclui un ilustracion di e geografia, historia di Aruba y impacto di clima. Pero tambe a enfoca riba e desaroyo economico di Aruba. CARMABI a bisa cu den un periodo relativamente cortico, a parti noordwest di Aruba a bira un punto cardinal pa turismo y negoshinan asocia, mientras cu construccion di vivienda ta enfoca memey di e isla. E rapport ta mustra cu e intensidad di turismo na Aruba ta enorme, ta entre e mas halto den Caribe. Consecuentemente tin preocupacion cu e isla a yega su capacidad di carga pa turismo, sea ta pasobra ta sobre gasta e recursonan cu por usa pa recreacion of pa motibo cu turistanan mes lo por sinti cu tin sobrecarga (overcrowding). E realidad economico ta si cu turismo ta bon pa 90 porciento di e Producto Bruto Interno di Aruba, esta e GDP. Si sigui cu e tendencia, turismo lo ta 97.4 porciento di GDP pa 2027. Na e momentonan aki tin ambicion pa diversifica economia di Aruba den area di tecnologia, finanzas y comunicacion.

E balor economico di e sistemanan ecologico di Aruba

Sistemanan ecologico cu ta funciona ta percura pa un servicio y beneficio amplio pa hende, incluyendo e sosten na servicio cultural. Ecologia di Aruba ta e fuente primario pa e industria turistico. E balor di e sistema ecologico pa medio di turismo, cultura, pesca y e forma natural con ta saca e CO2 di aire ta casi 290 miyon dollar pa aña. E contribucion directo di turistanan ta e parti mas grandi di e suma aki cu ta 269 miyon dollar, cu ta haci Aruba e di dos pais mas dependiente di turismo na mundo.

Basa riba preocupacion cu Aruba ta perdiendo di atractivo turistico y competitividad cu otro isla, e Foro pa Futuro di Aruba na 2011 a conclui cu restauracion di forsanan ambiental y e ambiente natural ta di preocupacion grandi, pa por competi internacionalmente. Na 2018, Gobierno mes a bisa cu mas deterioro di e recurso natural di e isla lo bin cu impacto negativo pa e industria turistico di Aruba.

Turista lo no bolbe Aruba

Un encuesta recien a mustra cu mita di turista cu ta bishita Aruba, mas tanto di Merca cu ta 60 porciento di e totalidad, lo no bolbe e isla y e ecosistemanan marino y terestre deteriora compara cu nan estado awor aki. Esaki ta particularmente preocupante mirando cu Aruba ta conoci pa su grado halto di bishitantenan cu ta ripiti. Pues e encuesta ta ilustra e importancia di maneho di naturalesa pa sostene e fuente di entrada mas importante di e pais.

Sistema ecologico sensitivo

E futuro dramatico pa e caynan di coral, esta e rifnan hopi biaha ta pinta den un imagen cu e lo no sosode, segun CARMABI. Pero ya caba hopi region den Caribe a experiencia consecuencia di degradacion abrupto di e rifnan, cu ta conoci como collapse. Y tres factor ta drenta den wega.

E prome ta cu hopi biaha den caso di collapse di e rif, nan ta sosode asina lihe y sin spera ya cu factornan cu a considera sin importancia, a resulta di ta crucialmente importante pa mantene e funcionamento di e sistema di coral. Como tal, un acercamento cu precaucion na proteccion di rifnan ta esencial.

E di dos factor ta cu unabes e rifnan cuminza degrada y hende ta realisa kico a perde, generalmente ya ta laat pa cambia e situacion.

Y finalmente, unabes cu servicionan cu rifnan ta brinda pa medio di turismo y proteccion costal ta perdi, degradacion di e rifnan ta bira hopi costoso ya cu mester reemplasa un servicio asina. Por ehempel, Republica Dominicana ta depende riba su beachnan pa atrae turistanan y e rifnan di coral ta produci e santo cu ta forma e beach y ta preveni pa e costa experiencia erosion. Ora cu e rifnan di coral a cuminza desaparece, e beachnan tambe a desaparece cu a impacta turismo negativamente. Investigadonan a conclui cu pa cada meter di beach cu un resort a perde, e prijs averahe di camber di hotel a cay cu 1.5 dollar pa anochi. Si e beachnan na Republica Dominicana sigui desaparece na e grado actual, e industria turistico di Republica Dominicana lo perde entre 52 pa 100 miyon dollar den e proximo decada.

Otro ehempel riba e impacto economico di degradacion di recursonan natural ta locual a sosode na e costa Noord di Jamaica. Sobrepesca a conduci na un caida di 13 porciento den e volumen di pisca cu a logra captura, y un caida di 17.3 porciento di e balor di pesca entre 1968 y 2001. Jamaica no a tuma paso efectivo pa maneha su pesca y falta di pasonan nacional tin un impacto di entrada perdi di 1.6 biyon dollar entre 1975 pa 2000.

Ecologia salud ta produci mas cu industria crucero

E hecho cu sistema ecologico saludabel ta percura substancialmente pa mas entrada turistico cu cualkier otro forma di turismo, manera turismo di masa of turismo crucero. Un estudio na Belize di 2008 a mustra cu turistanan cu ta bishita e pais pa su coral y boskenan di mangel, turistanan a gasta entre 176 pa 265 miyon dollar na hotel, recreacion di rifnan (por ehempel sambuya) y otro gasto na Belize. Esaki ta coresponde na 1 miyon dollar pa cada kilometer di rif pa aña. E industria crucero di Belize a cambio ta trece cantidad halto di turista, 620 mil na 2007, pero tin un impacto economico hopi abao, cu ta di 5.3 pa 6.4 miyon dollar. Henter e industria di crucero di Belize ta genera e mesun entrada cu apenas seis (6) kilometer di costa cu sistema ecologico cu ta funciona, manera rifnan di coral y boske di mangel.

Ademas mehoracion den coleccion y tratamento di awa sushi y evita cu nan ta drenta lama ta beneficia e coralnan y hende, pa medio di calidad di awa mehora y reduccion di risico di infeccion bacterial, alga y pisca toxico. Calculacionnan ta mustra cu pa cada dollar inverti den sanidad, y awa limpi, e beneficio ta 3 pa 34 dollar den mehoracion economico, ambiental y social.

Pa CARMABI, estudionan ta duna evidencia cu falta di proteha e recursonan marino ta trece perdida economico substancial.

Bon Dia Aruba lo amplia riba e rapport importante aki cu ta ilustra e urgencia pa tuma paso pa salvaguardia no solamente e calidad di nos rifnan, pero e sostenibilidad di economia di Aruba ((red. Bon Dia Aruba a haci peticion varios biaha pa e rapport tanto na Gobierno y departamentonan y tambe na Carmabi mes, despues di e tende di dje. Na 2021, Carmabi a contesta Bon Dia Aruba bisando cu e rapport ta traha riba instruccion di Gobierno y como tal no por publica e rapport e tempo. Awor a cambia di opinion ya cu e concepto di e rapport a keda publica).

LEAVE A REPLY

Please enter your comment!
Please enter your name here