Durante un bishita reciente di un di e redactornan di Bon Dia Aruba na Bavel, Hulanda, el a cera conoci cu un proyecto solar, cu a keda estableci riba e sero di desperdicio di Bavel, cu ta parti di municipio Breda, Noord-Brabant. E sero ta 23 metro halto y tabata den uso como dump te na 1992.

Manera mas municipio den e region aki den e decadanan di uso di un dump a crea un sero bastante halto, cu a trece e pregunta kico haci cu esaki. A dicidi cu finalmente cu hiba henter e sero pa otro lugar, por ehemplo pa usa esaki como combustible den otro proyecto di genera electricidad di kimamento di desperdicio, no tabata factible y cu mester haci algo cu e sero, unda y manera cu e ta.

E sero, conoci como ‘Bavelse Berg’ ta abarca un tereno di 30 hectare y ora e proyecto tabata completo lo tabatin 94.000 panel solar, un di e parkenan mas grandi na Hulanda. E parke lo ta suficiente pa percura pa electricidad pa 10.000 hogar. E decision final a cay na 2018 y den e dos añanan despues a realiza e proyecto. E proyecto lo a costa entre 10 y 20 miyon euro. Pa sigura cu e material di e sero ta keda na su lugar a ancra esaki cu blokki di beton na su alrededor.

E parke solar a percura pa diferente pregunta cu mester a haya respuesta promer cu por a cuminza cu e construccion. E parke ta den vecindario directo di e base aereo Gilze-Rijen y mester a consulta cu ministerio di defensa tocante posible interferencia di e campo magnetico y aparatura di e base. Tambe tabatin extenso consulta cu e habitantenan alrededor di e sero. Finalmente practicamente tur hende a bay di acuerdo cu construccion di e parke.

Alternativa pa Aruba?

Bisa sin mas cu esaki ta un alternativa pa e sero di sushi na Parkietenbos ta demasiado prematuro. Por surgi varios aspecto tecnico cu ta haci esaki menos factible, sin embargo e por ta algo pa considera si. Un di e problemanan cu mester elimina ta e posibilidad di candela espontaneo riba e sero. Den e proyecto na Bavel mester a tene cuenta cu escape di gas combustible y tambe cu posible filtracion di awa cu sustancianan quimico contaminante, ya cu e sero ta rondona pa tereno di uso pa agricultura. Na Aruba e filtracion di material contaminante pa lama tambe ta un problema cu lo mester atende. Na nos autoridadnan e tarea pa evalua esaki.