Carole Baskin, kende a bira un sensacion di cultura pop pa motibo di e serie documental di Netflix, ‘Tiger King’, a ser demanda pa difamacion pa un ex-assistent. Como parti di e demanda, e yiunan di esposo fayecido di Baskin ta buscando mas informacion riba kico a pasa cu nan tata, kende a desaparece misteriosamente mas di dos decada atras.

E amienda di keho na un demanda anterior a keda entrega diamars den corte estatal na Tampa pa e tres yiu muhe di Don Lewis – Donna Pettis, Lynda Sanchez y Gale Rathbone – como tambe su ex-assistent, Anne McQueen. Tambe ta nombra esposo actual di Baskin y su santuario di rescate di tiger como acusado.

E demanda ta bisa cu Baskin a difama McQueen door di post un video riba su YouTube e luna aki den cual el a bisa cu McQueen tabatin un rol den desaparicion di Lewis. E declaracionnan aki y e acusacionnan di malversacion di fondo tambe a ser haci riba website di Basking, bigcatrescur.org, segun e demanda.

E demanda tambe ta solicitando loke ta conoci como ‘pure bill of discovery’, cu ta permiti pa compila informacion den un caso prome cu entrega un keho civil.

“A pesar di declaracionnan di lo contrario, nunca a explora e berdad den ningun corte y tin base di buena fe cu berdad lo habri solucionnan viable”, e demanda ta bisa.

E ‘pure bill of discovery’ lo ta ‘util pa identifica potencial acusadonan y teorianan di responsabilidad y pa obtene informacion necesario pa cumpli cu un condicion precedente na entrega di e demanda’, segun e documentonan.

Desaparicion di Lewis ta keda un caso habri. Na maart, Sheriff di Hillsborough County, Chad Chronister a anuncia cu su oficina tabata buscando pistanan nobo despues di e popularidad di ‘Tiger King: Murder, Mayhem and Madness’ di Netflix.

E documental ta tocante Joseph Maldonado-Passage, tambe conoci como ‘Joe Exotic’, un ex-cuidado di zoologico na Oklahoma. El a keda condena di purba di contrata un persona pa mata Baskin, kende tabata purbando di caba cu operacionnan di Maldonado-Passage, acusando e zoologico na Oklahoma di abusa animalnan y bende cachoro di felino grandi.

Den represalia, Maldonado-Passage a trece pregunta dilanti tocante desaparicion di Lewis. E documental extensamente a cubri e acusacionnan ripiti di Maldonado-Passage cu Baskin a mata su esposo y posiblemente dun’e como cuminda pa su tigernan. Baskin, kende ta fundado di Big Cat Rescue, nunca a ser acusa di ningun crimen, y a duna un declaracion refutando e acusacionnan haci den e serie.

Baskin, kende ta un participante den e show ‘Dancing with the Stars’ e temporada aki, no a bisa nada na momento cu e huesnan di e competencia di baile riba television a haci referencia den joke na e creencia cu Lewis a wordo mata y duna como cuminda pa tigernan na su santuario, segun e demanda.

Abogadonan pa Baskin a bisa diaranson cu nan no lo comenta riba procesonan legal andando.

LEAVE A REPLY

Please enter your comment!
Please enter your name here