Ayera, Corte Comun di Husticia a trata e caso Diamante contra e sospechoso A.A.H. den apelacion. Caso Diamanta ta un caso contra ex-politico di partido POR, Alan Howell, kende ta acusa di malversacion di fondo di fundacion di su partido. E caso tambe ta involucra ex-tesorero di e fundacion, J. van Putten.

Na maart di 2023 a bira conoci e sentencia di e caso. Corte den Prome Instancia a condena H. pa un castigo di prison di 24 luna, di cual 6 ta condicional, cu un tempo di prueba di 3 aña.

Howell tabata representante di e partido politico Hunto Nos POR na Parlamento di Aruba. E partido aki a ricibi door di ‘Regeling ondersteuning fracties’ contribucionnan financiero pa e funcionamento optimal di su fraccion. Pais Aruba transferi e fondonan aki na e fundacion di Hunto Nos POR cu tabatin e obhetivo di “apoya e fraccion di POR, promove y mantene e funcionamento optimal di e fraccion.” E fundacion tabatin dos director, Howell y Jacqueline van Putten kende tabata tesorero, segun e sentencia ta indica.

Cantidad substancial di placa di e fundacion a ser paga na Fondo Advisory – pero a resulta cu e compania aki no ta existi y no por haya nada di esaki na Departamento di Impuesto, manera reporta e tempo aya. E website tambe a indica cu difunto tata di Howell tabata tras di Fondo Advisory, y no un hurista manera tabata indica den documentonan. Ademas segun fiscal no a haya ningun factura. Tampoco a haya factura pa confirma declaracion di Howell, cu tabata paga su tata como consehero, mas bien, segun fiscal, a traha factura di pago despues di fayecimento di tata di Howell.

Van Putten tambe a wordo condena pa malversacion cu 120 ora di trabao comunitario y un multa di 1.000 florin.

Manera ta conoci, e acusacionnan di mal uso di fondonan pa e fraccion di POR a bira motibo pakico a baha e gobierno anterior di Gabinete Wever-Croes I di manera prematuro.

 

Impacto profundo

Ayera mainta, Ministerio Publico a pidi Corte Comun di Husticia pa sigui e huicio di Corte den Prome Instancia y pa confirma e sentencia cu hues a duna.

Banda di castigo di prison, Corte den Prome Instancia a condena e sospechoso pa paga un multa di 35.000 florin y a declara cu e 15.000 florin cu a ser confisca cerca dje, ta bay pa caha di Pais Aruba (verbeurd).

H. ta wordo acusa di malversacion di casi 200.000 florin entre december 2018 y maart 2021, y di a haci uso di documentonan falso entre october 2019 y april 2021.

E hecho cu ex-agente policial H. tabata tanto parlamentario como voorzitter di un fundacion liga na su partido politico durante e periodo ey, ta haci e acusacionnan contra dje mas pisa ainda.

E caso Diamante a cuminza lora despues di un señal for di cual a sali cu fondonan publico, cu Parlamento tabata paga na e fundacion menciona, tabata resulta pa gran parti riba cuenta di banco di e sospechoso.

Ministerio Publico ta considera cu H. a daña seriamente e confianza cu un ciudadano mester tin den parlamentarionan di Aruba.

E tipo di comportacion robes aki tin un impacto profundo riba e confiansa di comunidad den funcionarionan publico y den gobierno, y ta perhudica e credibilidad y integridad di Estado di Derecho.

 

Corte Comun di Husticia a cera e investigacion y lo dicta sentencia riba 8 di juli 2026.