Awe den oranan di atardi, Gobierno di Aruba y diferente instancianan a trece dilanti un actualisacion di casonan positivo di COVID-19 na Aruba cu a yega te 55.

Jurette Croes di DVG, kende ta miembro di e crisis team, a trece dilanti cu awe 31 di maart pa 2or di atardi nan tin 55 caso positivo di COVID-19, 626 persona cu resultado negativo y 681 cu a haci e test.

Di mesun manera, el a informa cu den cuarentena tin 193 persona cu tabatin contacto directo cu persona positivo y tambe tin den cuarentena 847 persona cu ta e biaheronan cu a drenta Aruba desde 17 di maart.

Di e pashentnan positivo, Croes a señala cu e edad maximo ta di 74 aña y edad minimo ta di 11 aña di edad. Na e momentonan aki tin 4 persona cu ta interna, cu un di nan ta den cuidado intensivo, 1 den cuidado medio y dos cu ta isola.

Ademas, di e 55 personanan positivo 96% ta personanan local, 23% tin un historia di biahe y 46% no a biaha, loke ta nifica cu nan a wordo infecta na Aruba mes.

Di loke ta trata e ‘Task Force’, Croes a menciona cu a cuminsa awe y nan tin e autoridad pa controla tur persona cu ta den cuarentena y si nan no por localisa un persona cu ta den cuarentena na su cas na unda e mester ta, e persona lo haya un boet.

LEAVE A REPLY

Please enter your comment!
Please enter your name here