Recientemente, Central Bureau Statistiek a publica su Indice di Prijs di Consumo pa luna di mei 2022.

Indice di Prijs di Consumo pa luna di Mei 2022

E CPI pa luna di Mei 2022 ta 102.49, loke ta representa un subida di 0.3% compara cu e indice di April 2022 (102.16) y acumulando un subida di 1.9% te cu na Mei di e aña aki.

E cambio di e CPI pa e ultimo diesdos (12) lunanan (Mei 2021 te cu Mei 2022) ta 5.2%, un subida di 5.4 punto di porcentahe (ppt) compara cu e periodo corespondiente di aña pasa (-0.2%). E promedio anual (ultimo 24 luna) di e tasa di inflacion pa e periodonan di Mei 2020 te cu Mei 2021 y Mei 2021 te cu Mei 2022 ta 3.0%, un subida di 5.2 ppt compara cu e -2.2% registra den e periodonan di Mei 2019 te cu Mei 2020 y Mei 2020 te cu Mei 2021.

Durante e luna aki, ocho (8) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a wordo registra pa e sectornan di “Cuminda y bebida no- alcoholico” (1.4%), “Salud” (6.8%) y “Paña y sapato” (5.0%), causando un efecto di 0.16, 0.14 y 0.12 ppt, respectivamente. E subidanan den e sectornan restante a contribui cu un efecto di 0.13 ppt riba e CPI di Mei 2022.

E subidanan aki a wordo contraresta parcialmente door di principalmente un caida den e indice di e sector di “Recreacion y cultura” (-1.4%) cu a contribui cu un efecto di -0.13 ppt riba e CPI di Mei 2022. E caida den e sector restante a contribui cu un efecto di -0.09 ppt riba e CPI di Mei 2022. E subida den e sector di “Cuminda y bebida no-alcoholico” a wordo causa door di principalmente un subida den e categoria “Cuminda” (1.5%), causando un efecto di 0.15 ppt. E subida den e sector di “Salud” a wordo causa principalmente door di un subida di 9.3% den e categoria “Producto, aparatonan y ekipo medico”, causando un efecto di 0.12 ppt. E subida den e sector di “Paña y sapato” a wordo causa door di principalmente un subida den e categoria “Paña” (5.5%), causando un efecto di 0.11 ppt.

E caida den e sector di “Recreacion y cultura” a wordo causa principalmente door di un caida den e categoria “Vacacion” (-4.8%), causando un efecto di -0.14 ppt. Canasta di consumo E canasta di consumo di e CPI ta consisti di 408 bienes y servicionan. Compara cu April 2022, 52.2% di e bienes y servicionan aki a conoce un aumento di prijs causando un efecto di 0.89 ppt, mientras cu 29.2% ta mustra un caida di prijs, cu a contribui cu un efecto di -0.57 ppt y pa e restante 18.6% no tabata tin cambio den prijs. Prijsnan di bienes a subi cu 0.8% y a causa un efecto di 0.49 ppt. Prijsnan di servicionan a conoce un caida di 0.4% y a causa un efecto di -0.16 ppt riba CPI di Mei 2022.

Core inflation

E CPIC (core inflation) – CPI excluyendo e efecto di energia y cuminda – a registra na Mei 2022 un subida di 1.7%. E indice di energia – cu ta consisti di e productonan: electricidad, awa, gasolin y diesel a registra un subida di 8.7%. E indice di cuminda a registra un subida di 4.0%.

Bestaansminimum

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Mei 2022 ta Afl. 5,046, un subida di Afl. 294 compara cu Mei 2021 (Afl. 4.752). E bestaansminimum pa un hogar di un (1) adulto ta Afl. 2,403, un subida di Afl. 140 compara cu Mei 2021 (Afl. 2.263).

LEAVE A REPLY

Please enter your comment!
Please enter your name here