Fundacion Contra Violencia Relacional (FCVR) a anuncia ayera durante un conferencia di prensa nan eventonan di recaudacion di fondo cu lo tuma luga den e simannan cu ta bin pa asina yuda cubri e gastonan cu e fundacion tin diariamente.

FCVR ta un fundacion cu ta existi pa mas di 25 aña. Hopi conoce e fundacion mas bien bao di e nomber di Fundacion pa Hende Muhe den Dificultad, pero alrededor di un aña y mey pasa e nomber a wordo cambia pa Fundacion Contra Violencia Relacional.

Rish-Ann Ammerlaan, trahado social di FCVR ta splica cu e motibo pakico a cambia e nomber di e fundacion ta pasobra ora cu persona scucha hende muhe den dificultad hopi biaha nan ta pensa cu e fundacion ta yuda solamente hende muhe, pero e fundacion kier a inlcui e ser masculino tambe den e organisacion. “Fundacion Contra Violencia Relacional ta mas general y tambe ta brinda ayudo tanto na hende muhe como na hende homber”, el a bisa.

E fundacion ta traha riba diferente pilarnan. E tin e parti ambulatorio caminda cu cliente por acerca nan pa ayudo, pa guia y empoderamento. Tambe nan tin ayudo residencial cu ta e parti na unda ora un hende muhe ta pasando den crisis, e por haya alohamento temporal na e fundacion y durante e alohamento aki e ta haya su guia, empoderamento cu e intencion cu na momento cu e sali di e fundacion e por para fuerte ariba su pia.

Ammerlaan a remarca cu e parti residencial si ta solamente pa hende muhe ya cu ainda nan no tin un cas di refugio pa hende homber, pero ta un idea cu ta riba mesa pa futuro. E fundacion tin tambe e pilar di experticio caminda nan ta bay diferente scolnan, compania y tur esnan cu ta acerca nan pa e parti di informacion y conocemento. Nan tin e parti di abogacia y nan ta traha hunto cu Gobierno di Aruba pa por yega na leynan cu por yuda den e parti di violencia.

Thalina Willems, assistent trahado social FCVR a duna informacion tocante e recaudacion di fondo cu lo tuma luga den e simannan binidero. E recaudacion di fondo lo colecta ariba caya y lo tuma luga riba e siguiente tres diasabra, cuminsando diasabra 25 di juni, e siguiente lo ta ariba diasabra 2 di juli y e ultimo lo ta diasabra 9 di juli.

E meta di e recaudacion di fondo aki ta pa logra recauda fondo pa operacionnan diario di e fundacion y esaki ta implica cubrimento di gastonan di awa, gasolin, coriente, cuminda y tur otro cos cu ta encera operacionnan diario.

Otro meta cu FCVR kier logra ta pa haya mas boluntario pa yuda cu e recaudacion di fondo pasobra e fundacion lo kier cubri diferente localidadnan clave rond di Aruba, manera brug di Renaissance, dilanti di Imelda Kleuterschool, rotonde na Pos Chikito, rotonde di Santa Cruz y idealmente cubri e rotonde di San Nicolas tambe.

Willems a indica cu actualmente e fundacion ta coriendo tekort tur luna cu tres mil florin y e obhetivo principal di e recaudacion di fondo ta pa cubri mas tanto posibel di e falta di fondo aki.

Pa loke ta trata ayudo brinda na clientenan, Willems a splica cu pa e aña aki te cu luna di mei, e fundacion a brinda ayudo na mas di 80 persona caba. Aña pasa e fundacion a logra brinda ayudo na 296 persona total y cifra aki ta basa ariba ayudo ambulante cu e fundacion ta ofrece. Pa loke ta ayudo residencial, e aña aki te cu luna di mei un total di 20 persona, acompaña pa nan yiunan, a haci uso di e facilidadnan di e fundacion.

Magaly Maduro, coordinador di e fundacion desde 2016, a splica tambe cu pa loke ta e parti residencial, te ainda e fundacion no ta cobra pa niun hende keda cerca nan. E fundacion mes ta responsabel pa tur gasto cu tin di haber cu nan clientenan y esey ta inclui cuminda, paña, gasolin, entre otro.

“P’esey nos ta pidi ayudo financiero. Nos tur sa cu nos a pasa den pandemia unda hopi hende no tabatin entrada, nos hendenan cu tabata semper sponsornan grandi, a mira cu nan mester a minimalisa of reduci nan ayudo cu nan ta brinda nos”, Maduro a indica.

Desde aña pasa e fundacion tin mas camber y esaki ta trece cune mas gasto. Gobierno a tene for di e fundacion tambe 5% di nan subsidio, kiermen esey tambe nan sinti su impacto como fundacion. Maduro a subraya cu FCVR ta conta riba e pueblo generoso di Aruba cu sa duna nan donacion constantemente, sea den forma material of financiero.

“Nos tur sa cu e situacion a bira mas dificil no solamente pa FCVR, si no pa tur e otro fundacionnan cu ta existi aki na Aruba. E fundacion ta conta te ainda riba donacion di pan regularmente, pero apart di esey nos no tin ningun palabracion fiho cu pa luna nan ta ricibi un cantidad specifico. Esey ta algo cu nos a laga semper na e pueblo generoso y di berdad mi tin cu bisa cu den 26 aña nos tabatin hopi amigonan y nos tin ainda, pero nos tur sa cu e situacion a bira menos bon pa henter mundo en general”, Maduro a agrega.

Manera menciona e fundacion ta ricibi subsidio y nan ta haya sponsor di algun hende, pero toch esey no ta suficiente y aworaki por a tuma nota cu tin mas hende den necesidad y tin mas fundacionnan cu ta den necesidad tambe. Maduro a indica cu nan ta busca fondo internacional tambe, pero esey ta mara na proyectonan.

Aña pasa FCVR a organisa e colecta pa recauda fondo tres biaha den e aña y a traves di esaki nan a logra recauda un suma di 36 mil florin den total. “Si e aña aki tambe nos por haya esey of surpasa esey, e ta yuda nos cubri por lo menos e tres mil florin cu nos falta tur luna pa cubri e gastonan di operacion diario”, Maduro a finalisa.

LEAVE A REPLY

Please enter your comment!
Please enter your name here