Na Merca, hopi celebridad ta haciendo hopi mas cu djis tweet palabra di sosten of duna declaracion prepara cuidadosamente. Nan a subi caya hunto cu miles di persona pa condena e atake di hende color scur na man di polis, y pa exigi reforma.
“Mi tabat’ey na Los Angeles na momento cu a bati Rodney King y mi a mira esey, y mi a bisa ‘si nan logra esaki cu impunidad, kico ta bay pasa despues?’ Y e ta sigui pasa”, Jamie Foxx a bisa dialuna na San Francisco, unda el a join lidernan di iglesia y activistanan den un ‘kneel-in’.
Modelo y activista Emily Ratajkowski a tene un borchi bisando ‘desmantela structura di poder di opresion’; Paris Jackson tabatin un bisando ‘Paz Amor Husticia’, y esun rapper Machine Gun Kelly a bisa ‘Silencio ta traicion’. Strea di pop, Ariana Grande a tweet ‘nos a canta, hende a toca bocina y aplaudi’.
Cantante Halsey, kende tabata na e protesta cu su ex-pareha, e artista Yungblud, tambe a reporta cu e tabata victima di bala di rubber y gas lagrimogeno. “Nos ta pacifico. Man ariba, sin move, sin crusa linea”, el a skirbi riba Instagram. “Nan a tira nos cu bala di rubber y gas lagrimogeno varios biaha, riba ciudadanonan Mericano cu no tabata provocando nan.”
Artista Madison Beer a tweet diadomingo pa hende bay di Santa Monica inmediatamente. “Mi a caba di haya gas lagrimogeno”, el a tweet. “Nan ta arestando tur persona y tirando gas riba tur multitud.”
Entre e centenares di aresto na e demostracion mas tanto pacifico tabata actor di ‘Riverdale’, Cole Sprouse, kende a skirbi riba Instagram cu ‘esaki ta precisamente e momento pa contempla kico ta nifica pa para como un aliado’.
Rapper Killer Mike, ken su primo ta agente policial na Atlanta, a papia banda di alcalde Keisha Lance Bottoms y a duna un discurso pasiona cu pronto a bay viral. “Ta bo deber pa no kima bo propio cas pa rabia contra un enemigo”, el a bisa, agregando cu e tin hopi amor y respet pa polis mientras tambe ta reconoce cu algun di nan a haci cosnan ‘horibel’.
