Mondkap y distanciamento social por yuda controla coronavirus, pero labamento di man y otro medida ta keda necesario, segun un analisis nobo.
Investigadonan a conclui cu mondkap di un capa singular di tela ta menos efectivo cu mascara quirurgico, mientras mascara N95 a provee e miho proteccion ya cu nan ta fit preta. Un distancia di mas di 1 meter entre persona ta reduci chens di contrae virus, mientras 2 meter ta miho.
Proteccion di wowo manera bril of goggle por yuda tambe. Ningun strategia ta traha perfectamente y mester estudionan mas riguroso, segun e analisis publica dialuna.
Cu e coronavirus ainda nobo, oficialnan di salud a depende riba estudionan involucrando su primonan, severe acute respiratory syndrome (SARS) y Middle East respiratory syndrome (MERS). E hallazgo ta bin di un revision sistematico di 44 estudio, incluyendo shete involucrando e virus cu ta causa COVID-19. E resto ta enfoca riba SARS of MERS.
“Esaki ta pone tur e informacion claramente den un luga pa legisladonan usa”, co-autor di e estudio, Dr. Derek Chu di McMaster University na Hamilton, Ontario, a bisa.
Ainda ta wardando resultado di experimentonan mas riguroso na Canada y Dinamarca, cu ta test mondkap den gruponan asigna aleatorio di enfermero y publico general. Te e momento ey, e estudio nobo den journal Lancet ta provee siguransa cu e mascaranan ta yuda.
Oficialnan di salubridad publico a duna conseho conflictivo tocante mascara.
Organisacion Mundial di Salud (WHO), cu a patrocina e analisis nobo, a bisa cu hende saludabel mester bisti un mondkap unicamente si ta cuidando un persona infecta cu COVID-19. US Centers for Disease Control and Prevention kier pa tur hende bisti sikiera un mascara di tela na momento di haci compras of situacionnan similar unda tene distancia ta dificil.
