Cientificonan a observa chimpanzee salvahe comiendo un snack inusual: morocoy, cual nan ta crack e casca contra un palo prome cu come e carni. Den un papel publica ayera den Scientific Reports, investigadonan di Alemania ta bisa cu e comportamento cu nan a mira decenas di biaha den un grupo di chimpanzee na Parke Nacional Loango na Gabon ta sostene e nocion cu e primo lehano di humanidad ta desaroya nan propio cultura distinto.
Tobias Deschner, un di e autornan di e papel, a bisa cu mientras chimpanzee y morocoy ta coexisti den otro ambiente – y otro primate manera baboon y mandril ta conoci pa come morocoy cu ta suave y jong – cientificonan nunca a mira ningun cu ta crack e casca pa come e reptil.
Un splicacion por ta cu e region di Loango tambe tin hopi fruta cu casca duro, manera esun di palo strychnos, cu tambe mester dal contra palo pa habri, cual a stimula algun chimpanzee empresario pa purba e mesun tecnica cu morocoy, el a bisa.
“Nan ta mira e obheto cu casca duro aki cu algo interesante paden, y mi mester habri e”, Deschner, un investigado di primate na Max Planck Institute for Evolutionary Anthropology na Leipzig, a bisa. “Si mi por haci esey cu e fruta y tin e mesun problema cu un animal, mi por bisa, ‘ok, pakico no haci e exactamente e mesun manera’?”
Algun cientifico ta disputa e idea cu chimpanzee ta capaz di e tipo di ehercicio mental aki, mucho menos di siña e triki na otronan den un forma cu ta bira un ‘practica cultural’ entre henter e poblacion.
Pero Deschner y su coleganan di Universidad di Osnabrueck a bisa cu nan observacionnan na Loango ta sugeri esey ta locual a pasa.
“Nan tur ta uza exactamente e mesun manera pa haci e”, el a bisa. “Esaki ta sugeri pa mi cu nan realmente ta mira otro ta haci e, y nan ta copia e movemento.”
Otro investigadonan ta di acuerdo. “Esaki ta pas cu observacionnan anterior interpreta como comportamento tradicional, cual algun persona a describi como cultura”, Dietmar Zinner, un zoologo na e Centro di Primate Aleman na Goettingen, a bisa, kende no tabata involucra den e estudio.
E autornan tambe a nota cu chimpanzee mas debil usualmente ta pasa nan morocoy pa adultonan mas fuerte cu por habri esaki pa nan y comparti e cuminda entre henter e grupo.
Den un caso, un macho a wordo mira ta come mita di e morocoy, despues a hinca e casca den un arbol pa bin e dia siguiente pa caba e resto, sugeriendo cu chimpanzee ta capaz di planea di antemano, e autornan a bisa.
Deschner a bisa cu practicanan adkiri asina por bay perdi si gruponan particular di chimpanzee ta elimina, hasta si e area nan ta habita ta repopula atrobe despues. “Nos ta mira chimpazee ta desaparece rond henter Africa pa motibo di destruccion di habitat y caceria”, el a bisa. “Locual ta desaparece no ta unicamente e cantidad di animal, pero cu cada poblacion cu ta bay, tin un cultura unico cu ta bay perdi.”
