Cientificonan Hulandes ta desaroya reconstruccion di clitoris 40 aña despues di prome procedemento pa penis

(NLTimes)—Cuatro decada despues cu hende homber a haya e posibilidad, awor hende muhernan tambe por haci cirugia reconstructivo despues di perde parti di nan organonan sexual pa cancer. Investigadornan na Radboudumc a desaroya un procedemento pa reconstrui clitoris di hende muhernan cu a perde parti di nan clitoris pa motibo di cancer di vulva, e hospital na Nijmegen a reporta diahuebs. E prome reconstruccion di penis a tuma luga na 1987.

Cirugia pa cancer di vulva frecuentemente ta necesario pa salba bida, pero e tin un impacto grandi riba funcion sexual y calidad di bida di un muher. Mirando cu e prome cirugia reconstructivo di penis tabata casi 40 aña pasa, oncologo ginecologico Mieke ten Eikelder y ciruhano plastico Tim Nijhuis di Radboudumc a considera cu ya “tabata ora” pa desaroya un metodo pa restaura funcion sexual di e clitoris tambe.

“Ora e tumor ta situa den of rond di e clitoris, tin biaha nos mester kita un parti di dje,” Ten Eikelder a splica tocante cirugia pa cancer di vulva. “Te awor, despues tabata simplemente cera e herida y clitoris tabata disparce bou di un capa di cuero, cu poco atencion pa calidad di bida of si un orgasmo ainda lo ta posibel.”

E tecnica nobo ta cambia esaki. “Un bes cu kita e tumor, nos ta libera e bundelnan di nervio y cambia nan posicion pa crea un punta nobo di e clitoris. Despues nos ta cubrie cu un pida tehido chikito di mucosa for di paden di e boca. E tipo di tehido aki ta parce hopi e tehido cu tin rond di e vulva,” Nijhuis a bisa. Esaki ta yuda conserva sensacion den e clitoris.

Te awor, 23 muher a haya cirugia pa reconstruccion di clitoris. Nobenta porciento di nan por a logra un orgasmo clitoral despues di recupera. “Mayoria hende muhernan, sensacion ta bolbe na un nivel comparabel cu con e tabata prome cu cirugia,” Ten Eikelder a bisa. E reconstruccion ta agrega apenas aproximadamente 15 minuut na e cirugia.

Aproximadamente 450 muher na Hulanda ta haya diagnostico di cancer di vulva tur aña. Den alrededor di un cuarta parti di e casonan, e cancer ta afecta e clitoris of e area rond di dje. E investigadornan ta kere cu e procedemento tambe por yuda hende muhernan cu a pasa den mutilacion genital.

E procedemento pa reconstruccion di clitoris awor ta ser introduci den henter Hulanda como parti di un programa nacional di investigacion cientifico. Tur nuebe hospital Hulandes cu ta trata cancer di vulva ta participa.

Potret: Radboudumc