E codigo di proteccion miho conoci como ‘meld code’ ta un instrumento cu gobierno kier introduci y cu a wordo inclui den e proyectonan di social crisis plan pa atende cu e casonan di abuso di menor. Pero con leu e proyecto aki ta actualmente, mirando e necesidad urgente cu comunidad tin di dje?

Sue Ann Lacle-Ras kende ta coordinador nacional di Codigo di Proteccion a bisa cu e proyecto aki ta basta leu. E ta den e fase caba caminda na tin e adaptacion di e ley cla. E ta bay den cuater sector: social, enseñansa, salud y husticia.

Tin tres lider di cada sector aki (social, husticia y salud) cu a haci caba full e prome fase, entre otro kico tur e codigonan ta encera, kiermen den linea grandi, con e mester ta na Aruba. Esun di enseñansa tabata cla pa bin cune. Asina nan lo por determina con e codigo lo cana den cada departamento pa trece uniformidad. Pa asina cada profesional di cada sector sa kico e mester haci ora cu un situacion ta wordo presenta.

No mas meld code

E no ta meld code mas sino cu e proyecto a adopta e nomber nobo di Codigo di Proteccion. Den e proyecto aki nan ta trahando hopi di cerca cu Hulanda, caminda nan tin varios stakeholder importante cu ta brindando nan ayudo.

Un conseho tabata pa no usa e ‘meld code’ debi cu esaki ta un fout cu nan mes tin aworaki. Mirando e diferente opcion y teniendo na cuenta e concepto di e ley su espiritu, e ta mas tanto proteccion pa nos muchanan. P’esey nan a dicidi pone miho Codigo di Proteccion.

Tin pasonan incorpora y defini debidamente den e Codigo di Proteccion cu lo bay yuda pa baha e presion cerca e instancianan social y baha e meldingnan. P’esey nan a dicidi na Hulanda di no yam’e Meld Code mas.

 

Den su proceso di incorporacion aki den e proyecto aki -despues cu el a retira for di Parlamento- el a ricibi ayudo for di Hulanda pa medio di un serie di curso intensivo di capacitacion pa e por compronde e magnitud di e proyecto aki, ya cu na Hulanda e ta algo hopi grandi.

For di nan e por a filtra locual ta adaptabel na nos realidad si of no. E ta un ley cu ta bin cu su maneho. E ley aki tin cu bay bek na Parlamento, ya cu tin cierto adaptacion cu mester haci, caminda minister di Asunto Social, Glenbert Croes mester haci esaki na su debido tempo.

Lacle-Ras ta calcula cu pa october of november awor, e codigo di proteccion lo wordo presenta den su totalidad na Parlamento pa cana su caminda legal. Nan intencion ta pa cuminsa implementa e codigo di proteccion, entrante otro aña.

Cierto organisacion lo cuminsa implement’e caba, ya cu tin cierto pasonan cu nan ta ehecuta di e Codigo di Proteccion, pero nunca nan a wordo poni den un forma uniforma. P’esey den e structura di e proyecto aki tin un lider pa asina, e por zorg cu den su sector tur hende ta riba e mesun linea. Despues nan tin pensa di bin cu un plataforma nacional.

Pasonan

Tin cinco paso cu e profesional di cada sector entre nan docente, polis, etc… mester aplica. Nan ta pasonan cu tambe na Hulanda ta wordo usa. Nan ta e parti structural y organisatorio of cuadro di evaluacion pa atende cu supuesto caso di abuso di menor: Un paso ta esun di señalamento a base di algo concreto, cos cu bo por wak cu ta real, y no a base di suposicion.

E di dos paso ta cu e profesional ta bay den combersacion cu su colega of tambe den e caso local cu personal di Bureau Sostene Mi pa papia of trece dilanti bo preocupacion.

E di tres paso bo ta bay den combersacion cu e cliente. E ta considera e paso aki hopi fundamental, ya cu pa medio di tecnica di comunicacion, bo ta combersa cu e mucha y cu e mayor di e mucha tambe. Ya cu e mayor ta keda como e prome responsabel.

E tendencia generalmente ta meld sin cu e mayor sa. P’esey aworaki den e codigo di proteccion, e di tres paso, ta combersa prome cu nan. Den e paso aki ta wordo aclara mas e sospecho cu tabatin tocante e mucha su situacion. Si tur cos ta wordo aclaria debidamente, bo no mester meld na e instancia concerni. Esaki lo yuda pa baha e presion di melding cerca nan. Pero si ta resulta cu den e combersacion cu e mayor no por sali afo nada, y abo ta keda cu e sospecha cu algo no ta cuadra, e ta duna e posibilidad pa bay pa e siguiente paso.

Den e paso cuater, bo ta bay of tuma contacto cu un instancia social pa pone nan na haltura si bo mes por yuda den e caso aki. E profesional ta evalua e decision aki teniendo na cuenta aspecto importante, manera cu e mucha no ta den peliger structural of inminente. Si ta asina di biaha bo ta meld.

E di cinco paso ta cu si e mucha ta den un peliger structural, e profesional mester melding di biaha na Bureau Sostene Mi. E bureau aki automaticamente sa cu ya caba, e profesional a pasa den e pasonan anterior caba, pues nan no mester haci nan di nobo y nan ta atende e caso urgentemente, sin tene cuenta si e ta un code geel of oraño, etc… Sino cu ora e caso ta yega concretamente cerca nan, ta pasobra e ta un peliger structural of agudo cu nan tin cu atende inmediatamente. Pues el a bisa cu den e caso aki no ta trata gewoon di meld. Sino cu e profesional mester sa di brinda un servicio y na final bo ta meld.

Capacitacion

Encuanto e capacitacion di e profesionalnan den cada sector pa nan por brinda efectivamente e servicio aki, Lacle-Ras a bisa cu nan ta bezig cu esaki. Aunke hopi di nos profesional tin’e caba, ya cu casi cu nan ta haci e tipo di pasonan aki, sin cu nan sa debi cu no tin uniformidad.

Un parti cu e ta considera hopi importante ta e tecnica. Esta con bo ta bay combersa cu e mayor tocante e situacion aki. “E tecnica di e combersacion ta di suma importancia pa bo por aplica eynan,” el a bisa. Igualmente el a laga sa cu tin hopi herment y metodonan cu ta wordo usa y cu nan lo por yuda den esaki.

Tambe nan ta bay traha protocol pa determina kico e profesional mester haci pa atende cu caso of sospecho di abuso di mucha. E ta bay delinea tur locual ta haci parti di henter organisacion social.

Den e cuadro structural di evaluacion cu e 5 paso menciona, esaki kiermen cu tur nos profesional den diferente sector cu ta traha cu mucha sa exactamente kico mester haci di un forma organisatorio y tambe uniforma. Bureau Sontene Mi den momento cu cierto melding ta yega cerca nan, nan sa claramente di cual el a bin, pasobra tur un proceso prome a wordo cana caba, Lacle-Ras a bisa.

 

LEAVE A REPLY

Please enter your comment!
Please enter your name here