BOGOTA (Fuente: NTN24/ElTiempo) – E partido politico cu a surgi di e antiguo guerrilla di FARC a anuncia ayera cu nan ta retira nan aspiracion pa presidencia di Colombia, teniendo cuenta cu Rodrigo Londoño Timochenko, ex lider di e guerrilla, a haci operacion cardiaco diaranson na Clinica Shaio na Bogota.
“Circunstancianan ampliamente conoci tocante e proceso di recuperacion di nos candidato Timo, despues di e cirugia haci ayera, uni na e rasgonan di e contienda electoral ya señala, a hiba nos na dicidi di nos aspiracion presidencial”, Luciano Marin, ‘Ivan Marquez’ a bisa como vocero di e organisacion.
“Nos ta manifesta nos disposicion pa dialogo cu tur sector politico pa por tin espacio pa realisa e perspectiva di un gran convergencia nacional”,Marquez a agrega.
Cuestiona tocante ken nan lo ta apoya anto den e contienda electoral, Marquez a bisa cu “ainda nos no a yega na e discusion ey. Nos no a bay na e horizonte ey cu e situacion aki a genera.”
Otro representante di Farc ‘Carlos Antonio Lozada’ a refiri na e estado di Londoño y a bisa cu “nos por informa e pais cu e evolucion di e prome oranan tabata satisfactorio.”
Dia 1 di maart e lider politico mester a para su campaña y a keda interna den un hospital na Fusagasuga,pasobra segun informacion di Farc el a sufri un atake cardiaco. Despues el a keda traslada pa e Clinica Shaio na Bogota, unda e operacion a tuma luga.
E no participacion di Farc den eleccion presidencial no tin consecuencia pa nan participacion durante dos periodo den Senado y Camara di Representante, unda nan lo tin cinco puesto garantisa den ambos organo, a base di e pacto di paz, firma cu gobierno di presidente Juan Manuel Santos.
