Home Regional Venezuela: Crisis ta yegando na cuerponan uniforma

Venezuela: Crisis ta yegando na cuerponan uniforma

729

Caracas – E crisis Venezolano a cuminsa expande den e institucionnan gubernamental cu mester garantisa orden y siguridad publico. Ta saliendo informacion di e filanan di polis nacional Bolivariano cu lo ta sufriendo di un cantidad grandi di desercion di e funcionarionan activo na nivel nacional, cu ta core riesgo di ser husga pa traicion na patria, si nan no por hustifica pakico nan no a bolbe na nan puesto.

E funcionarionan policial, cu ta pasa den e crisis economico manera cualkier otro Venezolano, mester enfrenta e incremento di delincuencia cu ta opera sin ningun tipo di control den henter teritorio Venezolano y nan mes tambe lo ta emigrando pa busca miho condicion di bida pa nan mes y nan famia.

A haya sa cu e polisnan, desde rango halto te esunnan medio y mas abao lo no ta cumpliendo cu nan obligacionnan, pidiendo vakantie, retiro o simplemente desapareciendo di e cuerpo. Un situacion cu a cende alarma den e cuerpo policial unda ta cataloga nan di “traidor di revolucion.”

E fuente, cu a prefera di mantene anonimato, a revela cu entre e accionnan di control cu ta aplica contra e funcionarionan ta prohibicion di salida di e pais, blokeo di paspoort y alerta den e Sistema Integra di Informacion Policial.

Otro señal di malcontento den e cuerponan uniforma a bin e siman aki, unda aparentemente agentenan di e direccion di contra inteligencia militar lo a detene varios teniente coronel cu te na e momento ey tabata eherce den mayoria posicionnan di comando o segundo comandante den unidadnan operativo clave.

E oficial mas importante entre nan ta teniente coronel Igbert Jose Marin Chaparro, comandante di e batayon di infanteria motorisa Juan Pablo Ayala, cu sede na Fuerte Tiuna. El a keda deteni diabierna pasa ora el a yega na e sede mainta. Otro compañeronan di e mesun aña di promocion (1999) tambe lo ta bao aresto, y proximamente lo mester tuma luga e presentacion di e acusadonan dilanti e tribunal di control militar.

Esaki lo ta e di dos movimento di disidencia contra presidente Maduro, detecta den e filanan di e cuerpo mas importante, den apenas un aña. Na 2017 tambe a desmantela na ultimo ora un grupo di teniente y prome teniente, den mayoria di e promocion 2012 di academia militar.