(EFE) – Candidato presidencial Gustavo Petro, iskierdista di partido Pacto Historico, ayera dialuna a denuncia cu e grupo criminal ‘La Cordillera’ supuestamente tin planea un atentado contra su bida, pa loke a suspende su gira politico den e departamentonan di Eje Cafetero.

Asina a expresa un comunicado di campaña di Petro, den cual a sigura cu “e bishitanan na e Eje Cafetero cu tabatin fecha pa 3 y 4 di mei a wordo suspendi pa motibo di seguridad”.

E informacion a agrega cu, “di acuerdo cu e labor realisa pa ekipo di seguridad (di Petro) cu a ricibi informacion di fuentenan di e zona, e grupo criminal ‘La Cordillera’ tin planea atenta contra e bida di e candidato presidencial”.

La Cordillera, segun e documento, ta un organisacion paramilitar dedica na narcotrafico y sicariato cu ta opera principalmente na departamentonan di Quindio, Caldas y Risaralda, “nan a logra un control amplio riba autoridadnan civil regional y politico di e Eje Cafetero”.

E denuncia ta señala cu algun miembronan di polis y Ehercito di e zona, supuestamente ta forma parti di e grupo criminal aki.

E documento ta finalisa bisando cu e informacion di e atentado “a wordo verifica pa ekipo di analisis y investigacion di Campaña di “Petro Presidente”, cu “a haya acceso na fuentenan di credibilidad halto y di algun miembronan di e institucion policial, e cual a manifesta cu un integrante di Sijin (Seccion di Investigacion Criminal), cu a participa den asesinato di lider hubenil Lucas Villa, tambe ta forma parti di e plan criminal”.

Villa a muri na mei di 2021 despues cu a wordo asesina pa personanan desconoci na un sector di Pereira durante un jornada di manifestacionnan contra Gobierno Colombiano.

Di su parti, ayera Polis a sigura den un comunicado cu “te na e momentonan aki no tin ningun informacion di inteligencia cu por verifica e existencia di un plan criminal contra e candidato di movemento Pacto Historico”.

 

LEAVE A REPLY

Please enter your comment!
Please enter your name here