Diadomingo pasa, shete persona a muri y dos mas a keda herida despues cu un avioneta di aerolinea regional Transpacifico a cay riba varios cas, ora el a caba di lanta vuelo for di aeropuerto di e ciudad Colombiano di Popayán.

“Nos ta lamenta enorme e accidente aki cu a sosode pa un avioneta. E reporte no ta satisfactorio, a haya shete persona fayeci, dos persona ta den Hospital San Jose”, e Alcalde di e ciudad, Cesar Gómez Castro a afirma den un video.

Gomez a señala cu e organismo di control y Forsanan Militar a cera e luga di e accidente pa traha pa e rescate di e victimanan.

“Nos a convoca un conseho municipal di e gestion di riesgo cu tur organismo di socorro pa tuma medidanan y por presta e auxilio di un forma articula, coordina”, e funcionario a sigura.

E aparato, cu capacidad pa shete pasahero, tabata cubri e ruta entre Popayán y e localidad costero di López di Micay, ubica tambe na Cauca.

Aeronautica a agrega cu te e momento no ta conoci e causanan di e accidente, pa loke e trahadonan di investigacion di accidente ta den e zona pa ‘aclara e causanan posibel di e hecho’.

E resto di e avioneta a keda riba e dak di varios vivienda di e bario Junin, situa cerca di e pista di aeropuerto

 

LEAVE A REPLY

Please enter your comment!
Please enter your name here