Audiencia Nacional, cu ta fungi como Tribunal Supremo di Spaña, a rechasa den decision di ayera e peticion di gobierno Mericano pa extradita ex general Venezolano Hugo Armando Carvajal, ex Hefe di Contra Inteligencia di Hugo Chavez durante mas di 7 aña, reclama pa delito di narcotrafico.

E decision a ser anuncia, sin embargo, e argumentonan di e Audiencia no lo bira conoci te awe. Tampoco a keda comunica na ki momento lo laga Carvajal liber.

Carvajal tabata den prizon provisional desde luna di april, despues di a keda deteni na Madrid. E decision final si ta deporta Carvajal of no ta den man di gobierno Spaño, cu no tin obligacion di sigui e veredicto di Audienca Nacional, pero den mayoria di caso ta haci esey si.

Actualmente ta considera Carvajal un disidente di e dictadura Chavista, cu a haci un yamada na militarnan Venezolano pa rebela contra Nicolas Maduro. Ademas el a nenga e acusacionnan cu e tabata yuda e rebeldenan di FARC trafica cocaina pa Merca.

Durante e audiencia di extradicion siman pasa Carvajal a bisa cu Washington tabata inventando e acusacionnan, loke a trece duda si e ta bay coopera cu husticia Mericano den futuro, mirando loke nan a haci cune den e caso aki.

Den e audiencia el a splica tambe cu esunnan cu por testigua na su fabor den un proceso ta “ta o sanciona, o cu un visa revoca na Venezuela, otro ta preso na Mexico y otro ta morto, manera e caso di Presidente Chavez, cu tabata esun cu tabata duna mi orden directamente.”

“Nicolas Maduro mi conoce lo suficiente y mi sa di kico e ta capaz,” el a afirma acto sigui tocante e Presidente Venezolano, pa ken tambe e tabata hefe di contra inteligencia durante un tempo, aunke Carvajal awor ta declara cu e ta apoya e lider opositor Juan Guaido.

 

LEAVE A REPLY

Please enter your comment!
Please enter your name here