DOW y DIP cu ta resorta bou ministerio di Infrastructura a cuminsa controla di forma mas estricto y structura.

Director di DIP, Haime Croes a bisa cu su departamento hunto cu DOW ta mas bezig cu e parti di control, ya cu tin diferente tarea cu nan ta eherce riba e tereno aki, pero tambe hunto cu polis. Nan a institui un team cu a cuminsa reuni aña pasa y aworaki tur lunata reuni, y dia 19 di februari nan tin e siguiente reunion.

Den nan reunion ta evalua nan experiencia di cada luna, kico lo por a bay malo y kico a bay mas miho. Pero tambe e aspecto huridico ta uno importante cu ambos departamento di gobierno ta tene cuenta cune.

Haime Croes a bisa cu nan ta sintando hunto den un team pa purba ataca cualkier iregularidad, por ehempel den area protegi caminda ta wordo realisa otro actividad, pero tambe den areanan residencial. Aunke e ta reconoce cu nan no por haci tur cos pareu, pero nan ta bezig pa bin cu e control aki di un forma hopi sigur. “E tin nos atencion,” el a bisa.

Ya caba nan por a detecta hopi aspecto contra ley. Pero den tur procedura nan mester tene cuenta cu ley pa evita casonan dilanti corte, specialmente awor cu e ley di ROP a keda introduci recientemente, y e ta continua bou e maneho di minister nobo, Marisol Lopez-Tromp.

Croes a bisa cu hopi hende ta kere cu hopi cos a wordo tolera, pero tin hopi aspecto cu hues a duna un señal caba y cu nan mester tene cuenta cu nan. Den pasado hues a yega di bin cu varios veredicto cu nan mester tene na cuenta pa no ripiti e erornan cometi, ora cu nan ta ehecuta nan trabou di control.

Director di DOW, Marlon Croes a agrega cu nan tin un team caminda nan ta atende cu diferente asunto cu ta regarda riba aspecto di control. Den dje mester diferencia e aspecto di mal uzo di tereno of destinacion di e tereno; tipo construccion y proteccion di naturalesa y medio ambiente. Den e trabou aki hunto cu polis y tambe departamento di Naturalesa y Medio Ambiente (DNM), nan a traha un plan strategico pa ataca e tipo di problema aki. “Cada caso ta wordo studia ariba su meritonan,” director di DOW a bisa. Y si mester man duro nan ta yama cuerpo policial.

Mirando cu nan ta bay automatisa hopi cos di nan servicio, esaki ta facilita cu e mesun ciudadano por verifica y controla con cierto proceso cu el a solicita ta canando.

Tin algun proryecto cu ta den prome plano, manera esun di Secrets Baby Beach na Seroe Colorado.