J.K. Rowling ta publicando un storia nobo yama ‘The Ickabog’, cu lo ta gratis pa lesa online pa yuda entretene mucha- y famianan cera na cas durante pandemia di coronavirus.
E autor di ‘Harry Potter’ a bisa ayera cu el a skirbi e storia pa su yiunan como un storia prome cu bay drumi mas cu un decada atras. Tumando luga den un pais imaginario, e ta un storia di su mes ‘tocante berdad y abuso di poder’ pa muchanan edad entre 7 pa 9 aña y no ta vincula na e otro bukinan di Rowling.
Rowling a bisa cu e draft di e storia a keda den su zolder mientras e tabata enfoca riba skirbi buki pa adulto. El a bisa cu su yiunan, awo adolescente, tabata entusiastico na momento cu el a sugeri recientemente pa recupera e storia y publica esaki gratis.
“Pa ultimo simannan mi ta sumergi den un mundo imaginario cu mi nunca a pensa mi lo bolbe atrobe. Mientras mi a traha pa termina e buki, mi a cuminsa lesa capitulo tur anochi na mi famia atrobe”, el a bisa. “E prome dos lesado di The Ickabog a bisa mi cu nan ta recorda e storia di tempo cu nan tabata chikito, y a exigi pa trece bek e partinan cu nan ta gusta (mi a complace).”
A post e prome dos capitulo online ayera, cu capitulonan diario na caminda te cu dia 10 di juli. E buki lo ser publica impreso e aña aki, y Rowling a bisa cu e lo haci donacion di e ganashi di su benta na proyectonan yudando esunnan mas afecta pa e pandemia.
