(NLTimes) – Companianan Hulandes a importa droga sintetico peligroso for di India cu un balor den mercado ilegal di casi €2 biyon entre 2019 y 2025, segun un investigacion di NOS y Follow the Money. 30 importador Hulandes a logra facilmente contrata laboratorio na India pa copia moleculenan di substancianan prohibi pa despues bende nan na Hulanda cu ganashi enormemente halto, segun investigadornan. Entre e substancianan tin stimulantenan Indio, substancianan similar na ketamina y e asina yama “droga zombie” flakka.

NOS y Follow the Money a descubri mas cu 700 pedido di materia prima pa droga sintetico, producto cla pa uso y substancianan usa pa corta droga. E pedidonan tabata cubri un total di 153.000 kilo di substancia. Segun investigadornan, hopi di e substancianan aki ta ser bendi for di Hulanda na clientenan den exterior.

E comerciantenan Hulandes a paga cerca di €46.2 miyon pa e 153.000 kilo di substancia. Segun calculacionnan di NOS y Follow The Money, basa riba e balor di e droganan riba mercado online, e comerciante Hulandesnan a bende nan pa casi €2 biyon, cu ta representa un ganashi gigantesco.

E comercio di droga sintetico ta asina lucrativo cu bendedornan ta sigui cu nan actividad toch despues cu nan a ser descubri. Por ehempel, na luna di april, autoridadnan NVWA y e Inspeccion pa Cuido di Salud y Hoben a cera 43 website cu tabata ofrece droga sintetico. Segun combersacionnan cu fuente den e mundo aki, esaki tabatin poco efecto. “Pa loke mi sa, ni un solo proveedor no a para completamente,” un dealer a declara. Hopi bendedor simplemente a habri un website nobo for di exterior, mientras cu otro a move nan benta pa canalnan riba aplicacionnan manera Signal y Telegram.

Droga sintetico, tambe conoci como kimiconan pa investigacion of substancianan psicoactivo nobo, ta un termino colectivo pa substancianan cu ta casi identico na droga ilegal. Pa motibo cu nan ta diferencia solamente un poco di e droganan cu ta riba e Lista di Opio, ainda nan no ta prohibi oficialmente y por drenta Hulanda legalmente.

Segun e Centro Nacional di Informacion di Venenamento, e substancianan aki por ta hopi peligroso. Hopi di e substancianan importa for di India ta relaciona cu adiccion, batimento di curason acelera, presion halto, infarto, psicosis, coma, daño cerebral, atake epileptico y den algun caso hasta morto.