(AFP)—Presidente Ucraniano Volodymyr Zelensky a propone un reunion den persona cu Vladimir Putin den un carta habri pa e lider Ruso diahuebs, bisando cu tambe ta cla pa un “paro completo” den combate.
E carta ta marca un di varios biaha cu Zelensky a apela directamente na Putin desde e invasion di Rusia na 2022. Discusion entre Rusia y Ucrania a keda para pa algun luna, mientras negociacionnan lidera pa Merca a keda stanca debi na e guera cu Iran.
Rondanan anterior di negociacion entre e dos banda na Istanbul, Abu Dhabi y Ginebra a fracasa den haya logro riba asuntonan clave di teritorio den un acuerdo post-guera.
“Ucrania ta propone caba cu e guera aki via participacion directo entre nos—y boso. Mi ta proponiendo un reunion,” Zelensky a bisa den e carta, cual a ser publica riba e website presidencial di Ucrania.
“Ucrania ta cla pa un paro den combate pa e duracion di negociacionnan,” el a agrega. Zelensky a propone un intercambio di prisonero di guera, bisando cu e por ta “un bon comienso na caba cu e guera.”
No tabatin ningun comentario inmediato for di Putin, ken tabata finalisando un reunion cu reporteronan den exterior na Saint Petersburg ora e carta a ser publica.
Zelensky a haci yamado repetidamente pa un reunion cu Putin, bisando cu negociacionnan den persona so lo resulta den un acuerdo riba teritorio. Putin a sugeri cu e lo reuni cu Zelensky solamente si ta cla pa yega na un acuerdo di paz.
