Gobierno di Aruba ta anuncia cu e proceso oficial di registracion di Short-Term Vacation Rentals lo habri dia 1 di november 2026, pa 12’or di merdia. E registracion ta forma parti di e plan di accion aproba pa identifica, evalua y regula acomodacionnan turistico di duracion corto na Aruba.

Riba 15 di october 2026, Gobierno di Aruba a anuncia cu lo bin cu un registracion boluntario pa Short-Term Vacation Rentals, y pa cu esaki a instala un Taskforce interministerial.

E Taskforce, cu ta consisti di representantenan di e ministerionan di Finanzas y Asuntonan Economico, Infrastructura, Turismo y Salubridad Publico, a concentra den e prome fase aki riba preparacion di un sistema di registracion digital, elaboracion di e condicionnan necesario y coordinacion di e siguiente pasonan di e plan di accion aproba pa Conseho di Minister.

Gobierno ta encurasha tur propietario y operador di Short-Term Vacation Rentals existente pa registra nan acomodacion durante e periodo di registracion, cu lo habri riba 1 di november 2026 y lo sera dia 31 di januari 2027.

E proceso di registracion ta boluntario y lo dura tres luna. Gobierno ta encurasha tur propietario y operador di Short-Term Vacation Rentals existente fuertemente, pa haci uzo di e oportunidad aki pa nan propiedad y/of operacion por wordo registra y evalua den e proceso di regulacion.

E meta di e iniciativa aki ta pa crea mas claridad y siguransa pa e sector, respetando e derechonan existente y evaluando e posibilidadnan di legalisacion, unda cu esaki ta responsabel y legalmente posibel. Alabes, registracion lo permiti Gobierno pa haya un bista mas completo y actualisa di e sector pa por regula esaki na un manera responsabel y sostenibel pa cu e mercado y traha maneho.

Registracion boluntario

Participacion den e proceso di registracion ta boluntario. Esaki ta nifica cu propietario y operador no ta obliga pa registra y no lo haya multa simplemente pa no participa den e registracion. Un sistema di registracion obligatorio basa riba ley ta den preparacion y lo bay Raad van Advies dentro di poco.

Sinembargo Gobierno ta enfatisa e importancia di registra durante e periodo estableci pa por bin na remarca pa cay bou di e maneho temporal di tolerancia “tijdelijke gedoogkader” y pa wordo evalua y considera.

Registracion ta permiti pa identifica y evalua cada acomodacion individualmente, teniendo cuenta cu su situacion actual, e derechonan existente y e reglanan aplicabel. Pa esnan cu ta opera un Short-Term Vacation Rental, registracion ta un paso importante pa crea claridad tocante nan situacion y e posibilidadnan pa futuro.

Si registra, lo cay bou di e Maneho Temporal (Tijdelijke gedoogkader)

E acomodacionnan cu cualifica (activo prome cu 1 di november 2026) y cu wordo registra, lo cay bou di un tijdelijk gedoogkader, un maneho temporal di tolerancia durante e proceso di evaluacion y regulacion.

Esaki ta nifica cu, mientras e Taskforce ta evalua e registracion y determina e siguiente pasonan necesario, e acomodacionnan existente cu ta cay bou di e maneho aki por sigui cu nan operacion actual, dentro di e condicionnan aplicabel.

E maneho temporal ta brinda un periodo di transicion pa Gobierno por evalua cada situacion cuidadosamente sin cu e proceso di registracion mes ta interumpi e actividadnan existente.

Ta importante pa enfatisa cu registracion no ta nifica legalisacion automatico, aprobacion di permiso, ni derecho pa amplia acomodacion. Cada caso lo wordo evalua individualmente pa determina cua derechonan ta existi y cua pasonan adicional por ta necesario y tambe ta depende di cambio di ROPV.

Ken por registra?

E proceso di registracion ta destina principalmente pa e acomodacionnan cu tabata den operacion como Short-Term Vacation Rental prome cu 1 di november 2026, incluyendo esnan cu ya tin cualkier tipo di permiso.

Ademas, e proyectonan cu ainda no tabata den operacion prome cu e fecha aki, pero cu por demostra cu ya a tuma pasonan concreto y a asumi obligacionnan financiero of contractual significativo, por wordo considera pa evaluacion bou di un areglo di transicion.

Esaki por inclui, entre otro, acuerdo di financiamento, contrato di construccion, permiso relevante of comprobante di inversionnan haci prome cu e fecha di referencia. Un idea of intencion so, no ta suficiente pa cualifica.

E Taskforce lo evalua informacion y documentacion presenta pa determina si e acomodacion of proyecto ta cualifica, ta legalisabel y cua proceso ta aplicabel.

Informacion y registracion online

E registracion lo habri oficialmente diadomingo 1 di november 2026 pa 12:00 di merdia y lo keda disponibel durante un periodo di tres luna.

Desde awe, diabierna 30 di october 2026, e interesadonan por bishita e website oficial pa lesa informacion, na https://vacationrentalregistry.com/

Gobierno ta invita tur propietario y operador di Short-Term Vacation Rentals pa informa nan mes bon y haci uzo di e oportunidad aki.

Registrando, bo ta contribui na un bista mas completo di e sector y ta duna Gobierno e informacion necesario pa evalua bo situacion y determina e siguiente pasonan.

Cu e proceso aki, Gobierno ta sigui traha pa logra un balansa, cu ta tene cuenta cu importancia economico di e sector di Short-Term Vacation Rentals, eventual derecho existente y calidad di bida di nos comunidad.