(AFP)—Diesun pais Europeo a compromete nan mes diahuebs pa libera hunto 42.6 miyon bari di petroleo prome cu fin di januari, conforme cu un acuerdo di G7 logra e luna aki pa reduci preocupacionnan tocante suministro mundial di energia.
“Estadonan miembro di Union Europeo a reafirma nan compromiso pa acelera liberacion di 42.6 miyon bari for di reservanan strategico durante e lunanan binidero, y mas o menos mitar di esaki lo ta diesel,” comisario di energia di Union Europeo, Dan Jorgensen, a declara na periodistanan.
Diesun pais, incluyendo Francia, Alemania y Italia, a declara den un comunicado cu nan lo libera e petroleo for di nan reservanan strategico prome cu fin di januari 2027, incluyendo 20.5 miyon bari di diesel.
E anuncio ta bin algun siman despues cu e economianan di G7 a declara cu nan lo libera 100 miyon bari di diesel y petroleo crudo, despues cu presidente Mericano Donald Trump a menasa cu un prohibicion riba exportacion di diesel.
E otro paisnan Europeo involucra ta Belgica, Dinamarca, Grecia, Letonia, Luxemburgo, Hulanda, Portugal y Suecia. Lituania tambe a duna su apoyo na e iniciativa, aunke e pais no a firma e compromiso conhunto.
Agencia Internacional di Energia, di cual tur e paisnan di Union Europeo ta miembro, a haci un yamado na october pa su miembronan aumenta liberacion di nan reservanan di petroleo prome cu invierno.
Trump a aumenta presion riba Europa pa libera reservanan despues cu e guera Mericano-Israeli contra Iran a causa prijsnan di energia subi drasticamente. E situacion a caba di afecta Trump den su propio pais, unda costonan halto di gasolin a bira un asunto importante prome cu eleccion Congresional otro siman.
Union Europeo a declara cu e ta tumando e impacto di e crisis riba famianan masha serio, pero cu e no ta preocupa tocante suministro. “Nos no ta anticipa un problema cu seguridad di suministro como tal. Pero pa e ciudadanonan cu ta pasando dificil pa paga coriente, esey kisas no ta importa,” Jorgensen a declara.
