Despues di tres siman riba lama, Expedicion Inkfish Aruba a conclui su operacion di sondeo dia 12 di september 2026. E ekipo di cientifico, trahando for di e barco di investigacion RV Hydra, a completa e sondeo di ‘multibeam’ mas extensivo cu a yega di conduci den lama di Aruba, a scan tur obhetivo conoci y a identifica di por lo menos nuebe obhetivo nan ubicacionnan cu anteriormente no tabata conoci na e costa west di e isla. Aunke, e expedicion a conclui, ainda tin trabao substancial pa haci. E expedicion a genera gran cantidad di informacion cartografico, datonan fotografico y cientifico cu lo ser procesa awo y di cual e resultadonan lo ser presenta na maart/april 2027.
E expedicion a inclui traha mapa extensivo cu ‘multibeam’, tuma muestranan di ‘environmental DNA’ (eDNA) y ‘photogrammetry’ na sitionan di barconan cu a sink y di rifnan. A scan tur obhetivo conoci cu exito, uzando e sonar ‘multibeam’, y por lo menos nuebe obhetivo adicional a ser identifica na areanan costero west di Aruba. E expedicion tambe a conduci e prome sondeonan di eDNA na Aruba. E muestranan aki lo yuda investigadornan pa compronde miho e relacion entre sitionan di herencia cultural bou awa y e medio ambiente marino cu ta rondona nan.
E expedicion tabata un cooperacion entre Museo Arqueologico Nacional Aruba (MANA), Imagination for Development and the Nature of Values Aruba (IDNOVA), the Aruba Conservation Foundation (ACF) y e organisacion internacional filantropico marino Inkfish. E trabou tabata posibel door di preparacion extensivo di MANA, basa riba e ‘desk-based research’ di arkeologo Arubano Raymundo Dijkhoff. E investigacion aki a yuda e ekipo di Inkfish identifica y priorisa e sitionan pa e sondeo.
Durante e expedicion, arkeologo Arubano Harold Kelly di MANA y ecologo Arubano Oriana Wouters di IDNOVA a traha hunto cu e team internacional di investigacion. Door di nan participacion nan a haya experiencia hopi valioso cu metodonan di sondeo hopi avansa y a sigura Aruba su involucracion directo den colecta y interpreta e data.
Un ‘Memorandum of Understanding’ (MOU) firma pa Minister di Cultura Sr. Mike Eman ta sigura cu e data cientifico cu a colecta durante e expedicion ta keda accesible pa Aruba. Esaki lo sostene investigacionnan den futuro, educacion, e maneho a termino largo y e proteccion di e herencia cultural bou awa di nos isla.
