Rumor nunca ta haci falta na nos isla, y semper e mihor posicion pa tuma ta sinta warda pa e hechonan anuncia bira berdad si of no. Ta logico cu desde cu a firma e acuerdo cu Hulanda, nos ta tende varios rumor encuanto e metodo cu lo bay aplica pa reduci e cantidad di cupo di trabao cu gobierno ta pagando.

Segun un analisis di IMF pa gobierno, a resulta cu mensualmente mas di 8.000 salario ta haya nan caminda pa e diferente cuentanan na e banconan local. Ta di comprende cu, segun e acuerdo y e propuestanan cu e organismo COHO ta bin trece, lo bay tuma lugar un reduccion drastico di e cantidad ey. Un di e rumornan cu nos ta tende ta cu lo mester baha te na mas o menos mitar di e actual cantidad ey, alrededor di 4000 cupo di trabao anto. Esey riba su mes no ta algo pa cual nos mester un rumor pa duna bida na e cifra ey, pasobra finalmente, si nos ta papiando di un aparato publico cu ta pagable pa e tamaño di nos pais, nos lo yega na esey. Pues aki, rumor ta irelevante, e berdad ta den e mesun categoria…

Awor, naturalmente no ta trata solamente di cantidad, sino mas bien di con nos ta bay yega na e momento ey y, importante, conservando calidad di trabao. Y aki ta unda tin instrumento general, cu no ta tene cuenta cu calidad. Un posible metodo ta por ehemplo laga tur empleado cu ta cerca di nan fecha di pension bay mas tempran. Por ta cu pa esey ta necesario un cierto recompensa financiero, ya cu nan ta perde pension, si pa e fecha ey nan no a cumpli cu nan maximo di aña di servicio ainda. E desbentaha lo ta cu lo bay hende bon y hende menos bon pa loke ta nan prestacion na trabao. Esaki por afecta calidad di trabao, sigur pasobra den nos caso nos ta papiando semper di organisacion hopi chikito, unda un o un par di persona clave ta haci e diferencia pa loke ta e calidad di maneho cu e departamento ta hiba. Otro instrumento cu gobierno tin hopi aña ta maneha, cu poco exito, ta e famoso VUT (Vrijwillige Uittreding), cu tin poco exito pa via di su caracter voluntario. Sigur den e tempo dificil aki lo no tin hopi voluntario pa firma e acuerdo aki. Pero e ta keda un di e posibilidadnan, cu ademas por cambia pa un no voluntario.

Interesante lo ta kico ta bay usa como arma pa mantene eficacia den trabao. Esey por logra cu digitalisacion mas avanza, cu ta brinda e oportunidad pa reduci personal pero sin perde control y supervision. Esaki ta bay ta un reto grandi. Mayoria di departamento tin un sistema digitalisa, un mihor cu otro, pero casi ningun ta orienta riba aumenta eficiencia y reduci costo. Tambe e intercambio di informacion ta na un nivel hopi abao ainda, unda integracion di e databasenan basico y clave, manera Censo y Camara di Comercio, lo mester bira accesible den tempo real pa tur servicio di gobierno.

Sin embargo, hopi trabao ta keda pa haci banda di e medidanan general, specificamente pa cada departamento. Ta inevitable cu ta bin ‘doorlichting’ di cada departamento pa por determina kico ta e organisacion cu mester cu vista pa futuro, y e proceso debido pa yega na esey. Di mes no por kere cu e trabao aki por ser haci den poco tempo, pa mas cu tempo ta preta, ya cu den e proximo dos añanan sigur entrada disponible di gobierno no ta na e nivel pa keda mantene e peso di e 8.000 cuponan aki. Menos hende bandona e aparato, mas e presion lo ta riba tur cu a keda pa compensa e deficit, cu mas medida pa limita gasto di personal.

Kico tur esaki ta significa pa gobierno? Cu e espacio pa maniobra ta practicamente ‘nihil’. Nos a kere cu pa loke ta e situacion aki gobierno lo tabata mas cla cu e sindicatonan cu ta representa empleado publico, cu no tin nada di haya y cu pone nan beneficionan perdi back ta cos cu den e proximo añanan lo no sucede. Simplemente den e proximo añanan lo bay tuma lugar e proceso den cual Corsou tambe a pasa tanto aña pasa, cu a causa hopi dolor y cu a obliga nan inventa manera pa traha cu menos hende. Realmente, loke ta bay tuma lugar awor ta e proceso cu tin constantemente den sector priva, unda empresanan mester keda cuida gasto, sino no tin ganashi. Y den tempo di crisis, manera actualmente, esey ta conta mas ainda. Poco poco nos ta yegando na e momento cu gobierno lo mester laga e modelo di anda cu personal cay, unda bo tin un futuro y pension sigura pa bida largo, pa un modelo mas realistico unda prestacion ta clave. Esaki ta bay pone presion riba manera di pensa di politica, y di pueblo. Finalmente, esun cu ta goberna, ta haya awor e factura presenta pa 34 aña di mal gobernacion. Y, e proceso di coreccion aki ta bay tuma sigur cinco aña, 2021 y e cuatronan di proximo gobierno, ken cu ta sinta eynan.

LJMADURO – 11-DEC-2020