Conmemoracion di 100 aña di George Maduro su nacemento

Masha poco hende sa pa kico e caya di Biblioteca Nacional Aruba (BNA) na Oranjestad a wordo batisa bou e nomber di George Madurostraat.  Pero kende tabata e personahe aki?… y kico el a haci pa su nomber a wordo inmortalisa na Aruba? Si Aruba tabatin un Boy Ecury, nos isla ruman Corsou tabatin George Maduro, un hoben balente cu su bida a wordo sacrifica den cuadro di II Guera Mundial.

Den cuadro di 30 aña di Status Aparte y 40 aña di Himno y Bandera, e conocido ciudadano sr. Raymond Maduro lo ta e orador cu ta bay papia di otro Maduro, dia 18 di februari awor pa 7’or anochi na BNA.

100 aña di George Maduro

T’asina cu ta wordo conmemora 100 aña di e natalicio di George Maduro. E tabata un hoben cu a nace na Corsou y kende a biba apenas 29 aña pero suficiente pa inmortalisa su nomber ainda ta resona den historia di humanidad y specialmente di nos region.

Sr. Maduro a splica cu George Maduro tabata bringa na Hulanda den e ehercito di resistencia contra Alemannan. El a wordo fusila pa militarnan Nazi den un campo di concentracion ya cu e no kier a los e secretonan cu e tabatin. Pa tal motibo e ta wordo considera un heroe di II GM.

E tempo di II GM a wordo pidi La Reina Wilhelmina pa intercambia George Maduro cu algun preso Aleman di e regimen  Nazi cu tabata cera na Bonaire, pero e peticion aki no a wordo honra. El a fayece 9 di februari 1945.

E nomber di dje a wordo transcendi na Hulanda pasobra e famia prestigio Maduro di Corsou a regala na e ciudad di Den Haag, un ciudad miniatura cu ta carga e nomber di Maduro Dam; y tambe e plenchi na su nomber. E tabata un gratitud na Hulanda cu e tempo aya e peticion cu e mayornan a haci pa scapa su bida no a wordo honra. 

E tabata un yiu unico y sr. Raymond Maduro lo bin cu su stamboom.  Tin un joya historico skirbi na man di famia Maduro y e buki aki di e stamboom a wordo presenta na prensa pa sr. Raymond Maduro mes. Pues e lo presenta e rama di descendencia  famia di George Maduro. Tambe lo wordo mustra e copia di e carta caminda e famia di George Maduro a roga na La Reina pa facilita e intercambio aki, pero pa motibo no conoci historicamente, esaki no a wordo realisa.