Conseho di Salud di Hulanda a conseha gobierno pa no introduci un programa di vacunacion di dengue na gran escala na Aruba y e parti Caribense mas amplio di Reino na e momento aki, citando e incertidumbre continuo riba e balansa entre beneficio y riesgo.
E recomendacion, publica na comienso di april, ta sigui un evaluacion cientifico detaya di transmision di dengue, rindimento di vacuna y condicionnan epidemiologico local den henter e seis islanan di Caribe Hulandes: Aruba, Corsou, Sint Maarten, Boneiro, Sint Eustatius y Saba.
Aunke dengue ta keda un asunto di salud publico cu ta ripiti den e region, e Conseho ta conclui cu evidencia actual no ta suficiente fuerte pa hustifica un strategia di vacunacion pa henter e poblacion.
Dengue, tambe conoci como “knokkelkoorts,” ta un malesa viral transmiti pa sangura cu ta endemico den regionnan tropical y subtropical. E ta ser transmiti principalmente door di e sangura Aedes aegypti, cu ta hopi plama den Caribe. Mientras cu mayoria di infeccionnan ta leve of hasta asintomatico, e malesa por progresa den algun caso pa complicacionnan severo, incluyendo sangramento interno, daño na organonan y shock.
E presencia di dengue riba e islanan ta bon estableci. Segun e rapport, e virus ta circula continuamente den Caribe y tipicamente ta causa brote cada dos pa tres aña. E brotenan aki por varia den severidad y hopi biaha ta ser influencia pa factornan di temporada manera awasero, cu ta aumenta e criamento di sangura.
E brote mas recien, na 2023-2024, a subraya e riesgo continuo. Calculacionnan ta sugeri cu entre 360 yi 1.090 hende pa cada 100.000 habitante a keda infecta den henter e islanan. Den total, tabatin decenas di hospitalisacion y tres morto registra. Mientras cu e cifranan aki por parce relativamente abao, e Conseho ta señala cu probablemente nan ta subestima e berdadero peso di malesa, ya cu hopi infeccion di dengue no ta ser diagnostica of raporta formalmente.
A pesar di esaki, e introduccion di un programa di vacunacion no ta ser considera simpel.
Den centro di e discusion ta e vacuna contra dengue actualmente disponibel, Qdenga, cu a ser aproba na Europa for di 2022. E vacuna ta diseña pa proteha contra tur cuater variante conoci di e virus di dengue, conoci como ‘serotipo’ (serotype). Sinembargo, e analisis di e Conseho ta mustra cu e efectividad di e vacuna ta desigual.
Estudionan clinico ta indica cu e vacuna por reduci e riesgo di infeccion di dengue cu alrededor di 61% y e riesgo di hospitalisacion cu mas o menos 84% te cu cuater aña y mey despues di vacunacion. Mientras cu e cifranan aki ta sugeri un nivel di proteccion significante, nan ta revela tambe limitacionnan.
E vacuna ta parce di ta duna proteccion mas fuerte contra algun serotipo, particularmente tipo 1 y 2, pero proteccion menos consistente contra serotipo 3. Datonan riba serotipo 4 ta limita ainda, ya cu e variante aki tabata menos prevalente durante e estudionan. E variacion aki ta importante pasobra tur cuater serotipo ta circula den Caribe, y brotenan den futuro por ta impulsa pa cualkier di serotiponan aki.
Segun e rapport e incertidumbre aki ta haci’e dificil pa pronostica con efectivo un programa di vacunacion lo ta den practica.
Un otro factor critico ta seguridad. E Conseho di Salud ta subraya preocupacionnan continuo tocante un fenomeno conoci como mehoracion dependiente di anticurpa, of ADE. Esaki ta sucede ora un persona cu anteriormente no a ser infecta cu dengue haya e vacuna y despues ta contrae e virus. Den casonan asina, e contesta inmunologico causa pa e vacuna no por neutralisa e virus completamente y por, den teoria, conduci na un curso di malesa mas severo.
Aunke actualmente no tin evidencia cla cu e efecto aki ta sucediendo cu e vacuna Qdenga, datonan a largo plaso ta limita ainda. E Conseho ta enfatisa cu e posibilidad di un riesgo asina no por ser exclui ainda, particularmente pa infeccionnan causa pa serotiponan contra cual e vacuna ta ofrece proteccion mas debil.
E preocupacion aki ta specialmente relevante den poblacionnan cu nivelnan abao di exposicion previo na dengue.
Riba e islanan di Caribe, datonan disponibel ta sugeri cu hopi mucha ainda no a ser infecta cu e virus. Den gruponan asina, vacunacion por expone individuonan potencialmente na e riesgo teorico di ADE sin duna suficiente beneficio di proteccion.
E rapport ta remarca cu pa adultonan e situacion ta menos cla. Algun estudio ta sugeri cu un proporcion grandi di adultonan riba cierto islanan ya a ser exponi na dengue, mientras cu den otronan e proporcion ta significantemente mas abao. E variacion aki ta haci’e dificil pa diseña un strategia di vacunacion cu ta pas pa tur hende.
Guianan internacional ta reforsa e maneho cauteloso aki. Organisacion Mundial di Salud (WHO) ta recomenda vacunacion contra dengue principalmente den areanan caminda e transmision ta halto y caminda un proporcion grandi di e poblacion a keda infecta caba. Den regionnan cu transmision mas abao of nivelnan mas abao di exposicion previo, WHO ta conseha contra di vacunacion generalisa.
Di mesun manera, e Organisacion Panamericano di Salud (PAHO) a urgi paisnan den America pa abstene di introduci programanan di vacunacion na gran escala te ora cu tin datonan mas robusto disponibel, particularmente pa loke ta trata seguridad y efectividad den diferente grupo di poblacion.
Den su rapport, e Conseho di Salud ta alinia cu e recomendacionnan aki. E ta conclui cu, mirando e nivel di incertidumbre actual, no por determina cu suficiente confiansa cu un programa di vacunacion lo resulta den un beneficio neto di salud pa e poblacion di Caribe Hulandes.
Enbes di esey, e Conseho ta recomenda pa enfoca riba mehora colecta di dato y vigilancia. Esaki ta encera un miho monitoreo di infeccion di dengue, hospitalisacion y morto, como tambe informacion mas detaya riba cuanto persona ya a ser exponi na e virus.
Datonan asina lo duna un comprondemento mas cla di e situacion local y yuda informa decisionnan den futuro.
E Conseho tambe ta mustra riba e necesidad pa investigacion adicional riba rindimento di vacuna, particularmente relaciona cu serotiponan 3 y 4 y bao di individuonan cu no a ser infecta anteriormente. Ta anticipa cu estudionan continuo lo duna mas bista riba e preguntanan aki den e proximo añanan.
Mientras tanto, medidanan tradicional di prevencion ta keda esencial. Controla poblacion di sangura, reduci awa para y encurasha practicanan di proteccion manera uso di repelente y muskitero ta keda e hermentnan principal pa limita e plamamento di dengue.
Pa Aruba, e recomendacion tin relevancia local directo. Regularmente e isla ta experiencia brote di dengue, cu casonan ta aumenta durante periodonan di awasero ora e poblacion di sangura ta aumenta. Durante e brote regional mas recien na 2023–2024, Aruba a registra tanto infeccion confirma como hospitalisacion, mustrando cu e virus ta sigui circula y afecta salud publico.
E Conseho ta enfatisa cu su recomendacion no ta permanente. Segun cu evidencia nobo bira disponibel—sea pa medio di mehoracion di vigilancia, mas investigacion of e desaroyo di vacunanan nobo—e decision por ser revisa.
Pa awor sinembargo e mensahe ta cla: mientras dengue ta keda un preocupacion na Aruba y den Caribe mas amplio, e introduccion di un programa di vacunacion ainda no ta ser sosteni pa e evidencia disponibel.
