Contra conseho DIP y DOW: 7 tereno den saliña na Malmokweg otorga

Terenonan Malmokweg

7 tereno den saliña cu ta area proteha (wetlands) y asina destina den ley LRO (plan ordenacion ROP), ta riba lista pa otorgamento. Hurista di DIP a conseha negativo riba esaki sinembargo el a haya ordo di conseheronan di minister di Infrastructura pa sigui cu e proceso.

Departamento DOW tambe a indica cu lo no duna permiso pa construccion den e area aki como cu ta trata di naturalesa proteha. Un otro punto cu ta mustra atrobe cu no tin un maneho fiho y proceso transparente di otorgamento di tereno publico, ta cu e terenonan aki ta bay pa personanan cu no ta mucho largo riba e lista di speransa pa haya un tereno. E periodo di speransa tin un averahe di 7 aña aunke tin ciudadanonan cu ta wardando hasta 12 aña caba.

Un di e personanan cu ta riba e lista privilegio ta e yiu di locutor Stanley Arends, Jair Arends y tambe su pareha Aisha Arana pa haya tereno den e saliña. Bon Dia Aruba a purba di haya un comentario for di miembro di management di DIP, Isabel Dammers, pero no a logra. Nos kier sa con ta posibel cu un ambtenaar di e departamento mester sigui ordo di conseheronan di minister di Infrastructura Benny Sevinger mientras esaki ta bay contra reglanan.

Manera nos a skirbi varios biaha caba den nos corant, ainda nos ta pendiente tambe riba un entrevista cu minister Sevinger priminti nos riba hotelnan nobo na San Nicolas y tocante e documentonan cu partido POR a presenta riba e opcion di tereno bendi pa Leoncita Arends (di e mesun famia Arends).

DIP: ta sigui ROP
Pa cu e plan di ordenacion (ROP) ta 10 aña caba despues di e ley cu ta regla esaki LRO a pasa. Sinembargo ta 10 aña tambe cu gobiernonan (di MEP y AVP) no a sigui cu e parti di implementacion, esta e plan di reglamentacion (ROPV). E falta di e reglanan aki gobiernonan a uza frecuentemente pa desvia di e ROP pa duna tereno den area di naturalesa protegi pa construccion. Den un entrevista cu sra. Dammers, el a expresa cu DIP si ta mantene su mes na e ROP pa cu peticionnan nobo pa terenonan comercial. El a bisa esaki aña pasa durante e polemica di cobamento rond di Seroe Crystal. Pero despues nos por a constata cu minister di Infrastructura a sigui otorga tereno pa construccion, manera esun na Bubali Plas.

Bon Dia Aruba tambe ta constata cu no tin un maneho fiho pa otorga tereno publico. E procedura ‘normal’ ta cu hende ta haci un peticion na DIP unda mester cumpli cu cierto rekisitonan manera muestra cu tin suficiente placa pa por construi un cas of negoshi. E consehonan di DIP (y otro departamentonan den gobierno, manera DOW) e ora ta bay pa minister di Infrastructura cu ta esun cu ta aproba e peticion.

Pero manera nos por mira a base di e documentonan cu ta lek den prensa, tin un caminda mas cortico unda personanan ta entrega nan peticion directo pa minister cu ta aproba nan hopi mas lihe, hasta den un dia. Mientrastanto otro ciudadano mester warda hopi añanan pa haya un contesta final.

 

 

 

You May Also Like

11Jun, JO, Yellow.jpg

Fiscal ta exigi 18 aña castigo contra ‘Yellow’

Aki 3 siman lo haya sa e sentencia den caso di Yellow. Diabierna mainta corte ...

6Interview Michelle.jpg

Minister Hooyboer-Winklaar: “Dos termino como Minister ta suficiente”

Diaranson mainta durante su discurso na e congreso di dia internacional di hende muhe ...

Entrepeneur hoben tambe ta contribui pa trece mas bida na San Nicolas

Ayera atardi mandatario encarga cu infrastructura Otmar Oduber (POR) a yama un conferencia di ...

Atraco cas Tamarijn

Grupo arma atraca habitante, lag’e mara pafo

Un grupo di homber arma a atraca un habitante di Tamarijn y laga e ...

Geslaagd.jpg

Resultado di examen e aña aki ta miho cu aña pasa

Inspector General di Enseñansa y Hoofd Dienst Publieke Scholen a informa Minister Michelle Hooyboer-Winklaar ...

A construi 15 verkeersplateau y falta 35 mas pa wordo poni rond Aruba

Segun un comunicado di gobierno, e programa di luz den bario ta siguiendo, y ...