Home Editorial Cortamento di gasto di gobierno anterior..

Cortamento di gasto di gobierno anterior..

404

Tambe a haci daño

Ora nos ta sigui e comentarionan politico di dia, ta cuminsa forma e imagen di e gobierno anterior, cu nan tabata haci nada otro cu gasta placa na grandi. Aunke den hopi aspecto e pensamento aki ta corecto, tabatin otro manera mas cu nan tabata haci daño tambe na e pais, hustamente no gastando placa pa ekipa e departamentonan na un manera adecua. Esaki tabatin como consecuencia cu e servicio cu nan mester a brinda a sufri bastante.

Actualmente, cu e miedo a kita, e storianan a cuminsa sali. Ehemplo di esaki nos por mira den nos edicion di ayera, unda ta conta kico a sucede, of miho bisa, no a sucede den e departamento di otorga rijbewijs, pa falta di recurso financiero y humano. Esunnan perhudica atrobe ta e propio ciudadano, cu no ta haya e servicio riba cual e tin derecho. Y pa no laga ningun duda di ken tabata responsabel pa e situacion aki, esey ta e mesun cu a percura pa despues di ocho aña ainda polis na playa no tin un oficina drechi pa traha aden.

Mester bisa si cu en todo caso e emision di rijbewijs mes ta cana bon; loke no ta cana bon ta e asunto di examen. Nos por comproba esey pasobra algun tempo atras dilanti un redactor di nos corant e señora tras di loket tempran atardi, mester a cera pa bay atende esunnan cu tabata bin pa pasa examen, increibel. Anto no ta dificil pa nos kere cu en berdad tin un problema di personal.

Den cifra tambe nos ta mira e situacion aki refleha, na un manera cu ta papia pa su mes. Desde 2009 te cu 2016, gobierno tabatin un gasto anual pa loke ta Bienes y Servicio (Goederen & Diensten) di entre 205 miyon florin na 2009, te un record na 2013 (aña di eleccion) di 256,5 miyon florin. Na aña 2016, a pesar di e preocupacion cu presupuesto di Caft, ainda e post di presupuesto aki tabata un balente 230,5 miyon. Segun e documentonan disponibel recientemente, na 2017 e suma gasta tabata solamente 153,1 miyon florin; como 77 miyon menos cu e aña anterior. Anto no ta un cuestion di cu placa a caba na caminda so, pero ya caba e presupuesto 2017 tabata menciona un suma di 171 miyon so, como 60 miyon menos cu loke a gasta e aña anterior. De paso sea dicho, cu esaki ta un di e poco biahanan cu nos ta mira cu gobierno a gasta menos di loke tabata presupuesta. E presupuesto complementario modifica tabata menciona un suma di 174,5 miyon, y pa fin di aña a logra mantene e suma na 20 miyon menos.

En todo caso, cu e nivel di gasto aki, nos por imagina cu e departamentonan tabata den necesidad grandi, independiente di cu nan a keha of protesta, of cu nan a laga e asunto asina y keda keto, pasobra nan tabata simpatisa cu e gobierno di e momento ey. Con tal cu e resultado di e maneho ey lo ta bin manera un boomerang pa e gobierno actual, como si fuera tabata falta problema pa resolve. No ta asina dificil pa comprende cu ora no ta mantene un cierto nivel di gasto (hustifica), pero ta pospone esaki pa futuro, un dado momento e cuenta final por sali bastante mas halto. P’esey bo no mester ta experto financiero; nos tur sa cu ora bo no ta mantene bo cas of bo auto, finalmente bo por haya problema hopi mas grandi pa paga. Esaki ta e panorama general cu e aparato ta presenta, cu su consecuencianan serio pa presupuesto den e proximo añanan. Esaki sin duda ta pone gobierno actual den e situacion, unda ta clave pa establece prioridad. Esey tambe ta mas facil pa bisa cu haci, unda semper ta keda persona of departamento cu lo mester warda prome cu por cumpli cu nan.

Tumando tur esaki na cuenta, e manera di accion actual di oposicion ta bira algo casi comico. Nan a haci cu nos mester a bay check nos filenan, pa nos sa sigur ken tabata goberna dia 1 di september 2017, dia cu mester a entrega un presupuesto nobo. Y pa loke ta nan acusacion di incapacidad contra e gabinete actual, djis esaki: no ta e mesun funcionarionan experto den asunto financiero, cu a traha bao di e ministro anterior encarga cu financia, ta esunnan cu ta haciendo nan trabao, ainda?

Nos no tin absolutamente ningun motibo pa pensa cu nan no sa kico nan ta haci. Loke si ta recomendabel pa ambos banda di parlamento, ta pa presenta e cosnan manera nan ta. Ehemplo: den e debate cuanto e famoso proyectonan PPP ta costa nos, ta importante pa presenta e asunto manera cu e ta. Si e costo di un cierto proyecto ta inicialmente un cierto suma, ta logico cu den e pago di e prestamo durante tanto aña, cu interes y coreccion pa inflacion, e suma ta sali hopi mas halto. Ora bo cumpra un cas cu hipoteca, tambe bo ta paga e suma di compra finalmente algun biaha. Mas realismo den e cosnan aki no ta haci daño, al contrario.