Home Local Prijs di cuminda na Aruba mas faborabel compara cu islanan den region

Prijs di cuminda na Aruba mas faborabel compara cu islanan den region

551

Segun un rapport di Ecorys (Departamento di investigacion y consulta Hulandes) prijsnan di cuminda na Aruba ta relativamente mas barata den comparacion cu otronan den nos region.

Na Corsou durante periodo di 2010-2016 nan a haya un aumento den prijs di cuminda (+20%) cual ta mas halto cu Aruba, Hulanda y Merca durante e periodo aki. Na Sint Maarten, e rapport a describi problemanan serio cu desaroyo di prijs, cu un aumento di 53%. E rapport ta indica cu na Sint Maarten e costo di transportacion  ta un parti relativamente chikito di e prijs total di retail.

Ecorys a conduci un investigacion unda recientemente a keda publica e rapport final riba desaroyo di prijs y logistica na Aruba, Corsou y Sint Maarten). Gobierno di Hulanda a haci un peticion pa Ecorys conduci e investigacion aki cu a inicia na december 2016.  E rapport a keda presenta recientemente na Corsou. E base pa haci e analisis aki a bini por medio di preocupacionnan di cierto embahadornan/diplomaticonan cu a bishita Aruba, Corsou y Sint Maarten riba prijsnan halto di cuminda cu nan a constata. E idea ta pa wak si e iniciativa di e analisis aki por trece algun recomendacion, intervencionnan y medidanan pa influencia prijsnan den supermercadonan riba e islanan.

Posicion faborabel
E rapport ta bisa cu pa locual ta prijsnan di productonan di cuminda na Aruba, e posicion di e isla ta relativamente faborabel. E nivel di prijs index di Aruba na 2011 tabata net bao di e averahe pa e region di Caribe. Na mes momento e aumento den prijs di cuminda na averahe (+11%) tabata den liña cu desaroyonan di prijs na Hulanda (+9%) y Merca (region Miami, +14%) durante periodo 2010-2016.
Si mira e productonan individual di cerca por confirma e aumento general,  sinembargo cu algun iregularidad aki aya segun e rapport ta describi.  E analisis di e costonan a sigui refleha cu pa cierto grupo di productonan, e transporte di transportacion manera porcentahe di prijs retail tabata relativamente chikito. Otro componentenan di costo manera costo di compra, costo di operacion,
( personal, energia, etc.)  ta mucho mas importante.

‘Mercado di monopolio’
E rapport ta sigui bisa cu Aruba ta bon conecta cu hubs logistico manera Merca, Europa, Jamaica, Republica Dominicana y Colombia.  E mercado di logistica pa Aruba ta  concentra na bareranan halto pa entrada y un cantidad limita di competidonan riba rutanan principal. Esaki ta resulta den riesgo pa consistencia di producto y mercado di monopolio. Costonan di transporte ta relativamente halto debi na un ‘economies of scale’ (di e hubs) limita manera tambe limitacion di ganashi (freight exchange).
E rapport ta bisa cu consehonan  den casonan asina ta pa percura cu cualkier accionnan/medidanan tuma sigura e consistencia di supply, percura pa tin competencia husto (unda cu ta posibel) y stimula volumen/economies of scale. Riba locual ta sourcing (importacion),  Aruba ta depende primordialmente riba Merca y Europa pa motibo di e preferencia fuerte di consumidornan y supermercadoonan (brands, one stop shop, etc. ).

Nan ta menciona cu oportunidadnan ta den exploracion di comercio regional, oportunidadnan pa negoshi regional networking y match making na Colombia, Republica Dominicana y mas pa procesa eficiencia. Nan ta bisa cu esaki ta tuma tempo y no lo resulta den impactonan significante na momentonan aki.

Otro puntonan
Un opcion alternativo ta e stimulacion di agricultura local of import di ‘bulk products,’ manera un alternativa pa cumpra productonan ‘shelve ready’ na Merca of Europa, segun e rapport a sigui indica.
E rapport ta bisa tambe cu e waf di Aruba a conoce cambionan positivo despues di a habri e waf nobo. Oportunidadnan pa genera ma eficiencia ta mayoria di biaha relaciona cu e proceso di eficiencia (duana, servicionan mas amplio) y ampliacion di volumen.

E rapport ta bisa cu mirando e situacion di monopolio, un tipo di impuesto apropia mester keda sigura. E stakeholder nan ta considera esakinan basta halto. Pero e parti di ‘value chain’ (produccion, marketing etc.) ta funcionando bon segun nan ta describi. Puntonan specifico di atencion ta mas riba e proteccion di competencia husto, dunando forsa na e posicion di e consumidor, y revisa e sistema di permiso pa supermercadonan.

Colaboracion regional
E rapport ta indica cu tin potencial grandi pa un dimension di cooperacion den nos region. Den otro palabra, e desaroyo di cooperacion den region di Caribe ta laga hopi di desea. Banda di e diferencia den tamaño y forsa economico, tin diferencianan grandi ainda den e parti institucional. Pues algun isla ta parti di un otro pais Europeo mientras cu otronan ta independiente of tin algun ‘soft link’ cu colonisadonan anterior. Esaki por ehempel por wordo refleha den e partinan Hulandes y Frances na Sint Maarten.
E rapport ta bisa cu tin oportunidadnan grandi pa paisnan autonomo pa fortalece e logistica y condicionnan economico den general.

Algun ehempel cu nan a trece dilanti ta pa fortalece cooperacion y integracion economico den region di Caribe via iniciativanan specifico di World Bank, of via organisacionnan manera ACS;  promove Reino manera u oportunidad of exportado di inversion pa tercer paisnan of companianan. Cual ta inclui e paisnan autonomo fuera di Hulanda, y facilita relacionnan entre paisnan manera Colombia, Panama, Jamaica y Republica Dominicana. Un relacion stabiel lo por yega na diferente dimensionnan manera set up di contactonan regular cu promocion di agencianan di exportacion den e paisnan aki, of organisacion di actividadnan di network/match.

Henter e rapport di Ecorys ta obtenibel riba nan pagina di web www.ecorys.com.