Un decision importante di Corte den Prome Instancia di Aruba por tin consecuencia pa diferente empresa den sector di turismo y gastronomia cu durante 2023 a cuminsa paga BBO y BAZV na frontera.

Den un sentencia publica dia 24 di juli, Corte a declara cu un empresa cu ta maneha diferente facilidad di hotel y restaurant tabatin derecho di confia den un carta emiti door di Minister di Finanzas di e tempo ey, den cual a comunica cu e sector di Food & Beverage lo por deduci e impuesto paga na importacion di alimento y bebida. Pa motibo di esey, Corte a anula e naheffingsaanslagnan cu Departamento di Impuesto a impone pa e luna di augustus 2023.

E caso ta draai rond di e introduccion di e sistema di BBO na frontera, cu a drenta na vigor dia 1 di augustus 2023 como parti di Belastingplan 2023 Deel II. Cu e cambio aki, empresario cu ta importa mercancia a cuminsa paga BBO, BAVP y BAZV directamente na momento di importacion. Na mesun momento, e legislacion a introduci posibilidad pa deduci e impuesto paga na frontera, pero solamente den cierto circunstancianan y pa loke e ley ta defini manera “handelsgoederen”, esta mercancia destina pa rebenta.

Precisamente e definicion di “handelsgoederen” a causa hopi discusion durante preparacion di e ley. Tanto Raad van Advies Aruba como representante di sector empresarial a expresa preocupacion cu e termino tabata demasiado limita y cu por crea incertidumbre, specialmente pa restaurant, hotel y otro empresanan cu ta procesa alimento prome cu e producto yega na e cliente.

Segun e documento hudicial, durante e proceso legislativo diferente reunion a tuma lugar entre gobierno, Parlamento y organisacionnan empresarial. Entre e organisacionnan cu a participa tabatin Aruba Food & Beverage Association (AFBA) y Aruba Hotel and Tourism Association (AHATA), cu a pidi gobierno pa aclara con e sistema lo aplica pa e sector di turismo y gastronomia.

Dia 4 di juli 2023, e dos organisacion a manda un carta na minister, expresando nan preocupacion cu restaurant y hotelnan posiblemente lo keda exclui di e derecho pa deduci e impuesto paga na frontera. E mesun dia, Minister di Finanzas di e tempo ey, Xiomara Maduro, a responde cu un carta den cual el a indica cu gobierno tabata dispuesto pa amplia interpretacion di e termino “handelsgoederen” y cu sector di Food & Beverage lo haya tambe derecho di deduccion. E carta a menciona como ehempel cu un restaurant cu importa tortilla, carni y keshi pa prepara taco lo por deduci e BBO paga na frontera.

Despues cu e ley a drenta na vigor dia 1 di augustus 2023, e empresa cu ta central den e caso a importa alimento y bebida destina pa uso den su restaurantnan. Na momento di presenta su declaracion fiscal di augustus 2023, e empresa a deduci e totalidad di BBO y BAZV cu el a paga na frontera, basa riba e comunicacion oficial di e minister.

Poco tempo despues, Departamento di Impuesto a inicia un control fiscal. Segun e inspector, e alimento y bebida importa pa un hotel all-inclusive no por ser considera “handelsgoederen”, pasobra nan no ta ser bendi directamente, sino ta forma parti di un servicio mas amplio ofreci na huespednan. Riba e base ey, e inspector a rechasa e deduccion y a impone naheffingsaanslag pa un suma total di Afl. 31.175, consistiendo di Afl. 17.814 na BBO y Afl. 13.361 na BAZV.

E empresa a presenta obhecion contra e decision, pero Departamento di Impuesto a mantene su posicion. Esaki a resulta den un procedemento na Corte.

Den su evaluacion, Corte no a concentra prome riba e pregunta si e alimento y bebida tabata realmente “handelsgoederen”. Prome cu esey, hues a analisa si e empresa tabatin motibo pa confia den loke e minister a comunica oficialmente na e sector.

Segun Corte, e carta di 4 di juli 2023 no por ser considera simplemente un comentario politico of un reaccion informal. Hues a conclui cu e contenido di e carta ta cualifica manera un regla di politica (“beleidsregel”) cu empresario por a confia den dje. Corte a enfatisa cu e carta a forma parti di e proceso legislativo y cu tabata dirigi na un sector completo di empresa cu tabata directamente afecta door di e cambionan fiscal.

Corte a observa cu den e carta gobierno a comunica claramente cu sector di Food & Beverage lo haya derecho di deduci e impuesto paga na frontera. Segun e veredicto, un empresario rasonabel por a interpreta e comunicacion ey como un garantia cu e deduccion lo ta permiti durante e prome periodo despues cu e sistema nobo a drenta na vigor.

Mas despues, dia 13 di september 2023, gobierno a publica e Regeling Handelsgoederen. E regulacion aki a amplia parcialmente e definicion di “handelsgoederen”, pero tambe a establece condicionnan adicional pa restaurant y hotelnan. Den e regulacion, e derecho di deduccion ta depende di si e entrega di alimento y bebida ta predomina riba e aspecto di servicio.

E regulacion tambe a ricibi efecto retroactivo te cu 1 di augustus 2023. Precisamente e punto aki a bira decisivo den e caso.

Segun Corte, gobierno por cambia of limita un regla di politica pa futuro, pero no por haci esey cu efecto retroactivo si empresarionan a basa nan actuacion riba un promesa oficial anteriormente haci. Hues a considera cu aplica e regulacion nobo retroactivamente lo viola e principio di confiansa legitimo, e principio di seguridad huridico y tambe e principio di cuidadonan administrativo.

Den e veredicto, Corte a indica cu e confiansa cu e minister a crea den juli 2023 solamente por ser considera finalisa na momento cu e regulacion ministerial realmente a drenta na vigor, esta despues di su publicacion den september 2023. Pa motibo di esey, e naheffingsaanslag pa augustus 2023 no por keda na vigor.

Consecuentemente, Corte a declara e apelacion funda, a destrui e decisionnan riba obhecion y a anula completamente e naheffingsaanslag cu Departamento di Impuesto a impone. Ademas, Corte a ordena gobierno pa paga e gastonan legal di e empresa y debolbe e griffierrecht cu a paga pa e caso.

Na mesun momento, Corte a aclara cu e decision no ta pone un punto final na e discusion principal tocante e interpretacion di “handelsgoederen”. Hues a indica cu e pregunta material si hotel y restaurantnan tin derecho di deduci BBO y BAZV den otro periodonan ainda no a ser resolvi den e veredicto aki.

Segun Corte, ta perfectamente posible cu den futuro Departamento di Impuesto lo impone naheffingsaanslag pa otro lunanan despues di september 2023, loke por resulta den procedementonan hudicial adicional. E veredicto inclusive ta menciona cu, si un caso similar bolbe yega Corte, e instancia hudicial ta dispuesto pa trata esey cu prioridad, pasobra hopi di e elementonan factual ya ta conoci.

E importancia di e decision aki ta bay mas leu di e empresa involucra den e procedemento. Durante e introduccion di e sistema nobo di BBO na frontera, hopi empresa den sector di hotel, restaurant y otro actividadnan relaciona cu alimento a sigui cu hopi atencion e comunicacion oficial di gobierno pa por determina con nan mester prepara nan declaracionnan fiscal.

E veredicto di Corte ta confirma cu declaracionnan oficial di un minister, aunke nan no ser publica inicialmente como un decision formal, den cierto circunstancia por crea expectativa legitimo riba cual empresarionan por basa nan actuacion. Segun Corte, e confiansa cu gobierno mes a crea no por ser elimina despues cu efecto retroactivo si esey ta perhudica contribuyente cu a actua di bon fe.

Aunke e caso solamente trata e declaracion fiscal di augustus 2023, e veredicto por representa un punto di referencia importante pa procedementonan den futuro cu ta trata e aplicacion di e sistema di BBO na frontera y e interpretacion di e reglanan cu ta regula deduccion di impuesto paga na importacion.